O‘zbekiston Respublikasi Raqamli texnologiyalar vazirligi

Bugungi kunda O‘zbekiston kosmik tadqiqotlarni olib borish, zamonaviy texnologiyalarni joriy etish, tarmoq uchun yetuk kadrlar tayyorlash borasida jahon kosmik bozorining yirik davlatlari, nufuzli agentliklar hamda top universitetlari bilan o‘zaro samarali hamkorlik qilib kelmoqda. 

Xususan, “O‘zbekkosmos” agentligi mamlakatda kosmik ta’limni yanada rivojlantirish, yoshlarning texnik – muhandislik, astronavtika va astranomiya kabi yo‘nalishlarda bilim va tajribalarini oshirish maqsadida AQSh, Buyuk Britaniya, Fransiya, Janubiy Koreya, Xitoy, Yaponiya, Turkiya, Ozarbayjon bilan qo‘shma ta’lim loyihalari va dasturlarini amalga oshirib kelmoqda.

Yaponiyaning ilg‘or oliygohlaridan biri hisoblangan “Kyushu Institute of Technology” bilan imzolangan kelishuv ham 7 nafar yosh muhandis-konstruktorlarni 2 yil davomida magistratura bosqichida kosmik apparatlarni loyihalash, yig‘ish va sinovdan o‘tkazish yo‘nalishida o‘qitish imkoniyatini taqdim etadi. Bu vaqt oralig‘ida ular yaponiyalik tajribali professorlar bilan birgalikda O‘zbekistonning birinchi ilmiy – texnologik sun’iy yo‘ldoshi “6U Cubsat”ni yaratib, orbitaga uchirishlari reja qilingan.  

Qayd etish lozim, mazkur loyihani amalga oshirishda Davlatimiz rahbarining “2024 — 2026 yillarda iqtisodiyot tarmoqlarida aerokosmik texnologiyalarni joriy etish chora-tadbirlari to‘g‘risida” Farmoni huquqiy asos bo‘lib xizmat qilmoqda.

Ma’lumot uchun:

“Kyushu Institute of Technology” instituti 1907 yilda faoliyat boshlagan bo‘lib, QS reytingi bo‘yicha dunyoning eng yaxshi 1000 ta oliygohi qatoriga kiradi. Hozirga qadar bu yerni yuqori malakali talabalarga javob beruvchi 70 000 dan ortiq muhandislar tamomlashgan. Bugungi kunda kosmik ta’lim yo‘nalishida institut ko‘plab davlatlar bilan hamkorlik qiladi va muhandis-konstruktorlar guruhini tayyorlab, sun’iy yo‘ldoshlar yaratilishigacha ko‘maklashadi.

2024-yilning oktabr oyida “Kyushu Institute of Technology” instituti Yaponiya Aerokosmik tadqiqotlar agentligi (JAXA) tomonidan ishlab chiqilgan va UNISEC konsorsiumi tomonidan qo‘llab-quvvatlanadigan J-CUBE dasturi doirasida Moldova Texnika universiteti bilan istiqbolli hamkorlikni boshladi. Ushbu global tashabbus nanosun’iy yo‘ldoshlarni ishlab chiqishga qaratilgan bo‘lib, butun dunyo universitetlarini kosmik texnologiyalar sohasida qo‘shma tadqiqotlar va ishlanmalar uchun birlashtiradi.