O‘zbekiston Respublikasi Raqamli texnologiyalar vazirligi

28-yanvar kuni Toshkentdagi “U-Enter”da innovatsion ekotizim yetakchilarini: investorlar, hamkorlar va startaplarni jamlagan “Unicorn Battle” tadbiri o‘tkazildi. Turli sohalardan 120 dan ortiq startap ariza topshirdi. Natijada, da’vogarlar orasidan o‘z yechimlarini taqdim etishga va kengayish salohiyatini ko‘rsatishga tayyor bo‘lgan MVP’ga ega 18 ta startap saralab olindi.

Tadbirning ochilish marosimida IT Park ijrochi direktori Abdulahad Kuchkarov tabrik so‘zi bilan chiqish qilib, startapchilarni qutladi va ishtirokchilarga omad tiladi:

“Bugungi voqea O‘zbekistonning Markaziy Osiyoda startap ekotizimining muhim markaziga aylanayotganini yaqqol tasdiqlaydi. Bunday tadbirlar nafaqat tadbirkorlik madaniyatini rivojlantiradi, balki investorlar va xalqaro maydondagi yirik o‘yinchilarning e’tiborini ham jalb qiladi. Ishonchim komilki, ‘Unicorn Battle’da ishtirok etayotgan har bir startap ulkan salohiyatga ega va kelajakda mamlakatimiz iqtisodiy o‘sishining haqiqiy harakatlantiruvchi kuchiga aylanadi.”

Ishtirokchilar orasida venchur investorlar va “UzCard VC”, “Semurg VC”, “IT Park Ventures”, “Aloqa Ventures”, “Sturgeon Capital” hamda yaqinda tashkil etilgan “United Ventures” kabi yirik fondlar vakillari bor edi. Shuningdek, faxriy mehmon sifatida sobiq tashqi ishlar vaziri Vladimir Norov so‘zga chiqib, startaplar va yangi texnologiyalarning mintaqa uchun ahamiyatini ta’kidladi.

Panel muhokamasi: O‘zbekistonning rivojlanayotgan bozoridagi imkoniyatlarni ochish

Birinchi munozara moderatori, germaniyalik Alisa Foks, Markaziy Osiyo sun’iy intellekt assotsiatsiyasi raisi Vladimir Norov, “Aloqa Ventures” investitsiya menejeri Komiljon Ro‘ziyev, Markaziy Osiyo fintech assotsiatsiyasi raisi Otabek Nosirov va “UzVC” investitsiya direktori Abdulazal Toshxo‘jayev bilan birgalikda O‘zbekistonning jadal rivojlanayotgan bozoridagi investorlar uchun joriy va kelgusidagi imkoniyatlarni muhokama qildi.

Panel muhokamasi: AI-startaplarga investitsiyalar — rivojlanayotgan bozordagi imkoniyatlar

Moderator, “VISA” kompaniyasining mahsulot bo‘yicha mintaqaviy rahbari Iskandar Qurbonov sun’iy intellekt sohasidagi asosiy yo‘nalishlarga e’tibor qaratdi. Muhokamada, shuningdek, “IT Park Ventures” investitsiya menejeri Zaynab Atabaeva, “Gaude Business and Infrastructure Solutions” raisi Ashayesh Akleker, Komiljon Ro‘ziyev va Otabek Nosirov ishtirok etib, Markaziy Osiyoda sun’iy intellekt bilan ishlaydigan startaplarga sarmoya kiritish imkoniyatlari haqida ko‘plab g‘oyalarni o‘rtoqlashdilar.

Pitch-sessiyalarda 18 ta startap o‘z loyihalarini taqdim etdi. Har bir jamoa 3 daqiqa davomida o‘z g‘oyalarini namoyish qildi.

Finalchilar

Qizg‘in pitchlardan so‘ng uchta startap finalga chiqdi: “Azma Finance”, “Tilmoch” va “Verifix”. Ular mahsulotlarining yuqori sifati va innovatsion yondashuvi uchun e’tirof etildi.

G‘olib: Verifix — Kavkaz va Markaziy Osiyo mintaqasidagi iste’dodlar tanqisligini bartaraf etuvchi B2B SaaS HR yechimi. Jamoa ishchi kuchi to‘g‘risidagi ma’lumotlarni birlashtirish, ishga qabul qilishni tezlashtirish va turli sohalarda o‘sishni rag‘batlantirishni taklif qiladi. “Verifix” O‘zbekiston nomidan Silikon vodiysida o‘tkaziladigan xalqaro “Unicorn Cup” musobaqasida ishtirok etadi va u yerda o‘z startapini xorijiy investorlarga taqdim etadi.

2-o‘rin: Azma Finance — kichik biznes egalari uchun soliq hisob-kitobi, hisoboti va moliyaviy boshqaruvni soddalashtiradigan avtomatlashtirilgan buxgalteriya platformasi.

3-o‘rin: Tilmoch — turkiy tillarga ixtisoslashgan va o‘zbek tiliga tarjima qilishda “Google” va “Yandex”dan 2 barobar ustun bo‘lgan sun’iy intellektli tarjima xizmati.

Toshkentda o‘tkazilgan “Unicorn Battle” O‘zbekiston startap ekotizimida yorqin voqea bo‘ldi. U mahalliy kompaniyalarning xalqaro investitsiyalarni jalb qilish va yangi bozorlarga kengayish uchun yuqori salohiyatini namoyish etdi. Yildan-yilga bunday tadbirlar O‘zbekistonda innovatsion biznes va tadbirkorlikni rivojlantirishda muhim bosqichga aylanmoqda, mamlakatni mintaqadagi asosiy o‘yinchi sifatida mustahkamlamoqda.