O‘zbekiston Respublikasi Raqamli texnologiyalar vazirligi

“Raqamli hukumat – hukumat insonlar uchun” sammiti

Haftalikning dastlabki kunida Raqamli hukumat loyihalarini boshqarish markazi tomonidan “Raqamli hukumat – hukumat insonlar uchun” sammiti tashkil etildi.

Sherzod Shermatov: “Texnologiya qancha rivojlangan sari birinchi navbatda, insonlar uchun xizmat qilishi kerak. Hukumat IT sohasi tezlik bilan o‘zgarib, barcha sohalarga kirib bormoqda.

Sammitni o‘tkazishdan maqsad – raqamli texnologiyalar hukumatni qanday o‘zgartirishi hamda fuqarolarning ehtiyojlari va farovonligiga asoslangan hukumatni qanday yaratish mumkinligini muhokama qilishdan iborat”.

Tadbirda Birlashgan Millatlar Tashkiloti ekspertlari, Xitoy, Koreya, Qozog‘iston kabi davlatlardan yetakchi vakillar qatnashdi. Mahalliy ekspertlarning taqdimotlari tinglandi.

Sammitda soha vakillari va faollar davlatning raqamli transformatsiyasi va uning fuqarolar hayotiga ta’siri bilan bog‘liq muhim masalalarni, shuningdek, turli mamlakatlar va mintaqalarda raqamli hukumatlar erishayotgan muvaffaqiyatlar, duch kelinayotgan muammolar hamda imkoniyatlarni muhokama qilishdi.

Sammit davomida my.gov.uz portali va my.gov.uz mobil ilovasining yangi talqindagi taqdimoti ham o‘tkazildi. Bunda ishtirokchilar my.gov.uz’ning yangi ko‘rinishi, o‘ziga xosliklari, qo‘shimcha funksiyalari hamda qulayliklari bilan to‘liqroq tanishish imkoniyatiga ega bo‘ldilar.

Sammit doirasida barcha davlat idoralari, xoʻjalik tashkilotlari va hokimliklarning raqamlashtirish darajasi eng yuqori koʻrsatkichga erishgan tashkilotlar hamda hamkorlar turli nominatsiyalar boʻyicha taqdirlandi.

Startup Summit

Mazkur tadbirdan maqsad – mehmonlarni Oʻzbekiston startap ekotizimi, mintaqadagi eng yaxshi startaplar, investorlar va innovatsion kompaniyalar bilan tanishtirishdan iborat.

Tadbir doirasida Raqamli texnologiyalar vaziri Sherzod Shermatov hamda xorijdan taklif etilgan ekspertlar oʻz chiqishlari bilan qatnashdi.

Startup Summit ochilish marosimida IT Park Uzbekistan bosh direktorining innovatsiyalar boʻyicha oʻrinbosari Jahongir Rajabov soʻzga chiqib, Oʻzbekiston startap hamjamiyatini rivojlantirish boʻyicha oʻz qarashlari bilan oʻrtoqlashdi.

Shuningdek, IT Park Uzbekistan startap ekotizimini rivojlantirish boʻlimi rahbari Jahongir Kagirov Startup Base platformasining ishga tushirilishi haqida soʻz yuritdi.

Bundan tashqari, “Oʻzbekiston startap-ekotizimini ochish: venchur kapitalini jalb qilish va global qamrovni kengaytirish” mavzusidagi panel muhokamasi ham oʻtkazildi.

Tadbirning yakuniy bosqichida xalqaro venchur fondlari va mahalliy startaplar oʻrtasidagi B2B uchrashuvlar ham boʻlib oʻtdi.

“ICT Expo Uzbekistan” ko‘rgazmasi

Ko‘rgazma doirasida “Muxlisa” sunʼiy intellekti, my.gov.uz saytining yangi versiyasi, MyID ekotizimi imkoniyatlari va istiqbollari, Aloqa Bank talaba kartasi, Face ID toʻlov tizimi, “O‘zbektelekom IPO”ga chiqish taqdimoti, Aloqabankning “Raqamli xizmatlar platformasi” taqdimoti, Huawei (Xitoy) kompaniyasining O‘zbekistonda “IT ta’limga e’tibor” – korporativ ijtimoiy mas’uliyati taqdimoti, Plug and Play (AQSH) kompaniyasi boshqaruvchisi O‘zbekistonda startaplarni rivojlantirishning yangi ekotizimi boʻyicha taqdimotlar taqdim etildi.

Shuningdek, ko‘rgazma doirasida President Tech Award xakatonining maxsus yo‘nalish bo‘yicha gʻolibi taqdirlandi.

Hakamlar hayʼatining baholari va xakaton davomida loyihaning texnik amalga oshirilishi natijalariga koʻra, Maftuna Ziyamova, David Alkamyan, Yasmina Ablayeva va Azam Behruz kabi yoshlardan tarkib topgan Rammstein Theorem jamoasi gʻolib deb topildi.

Gʻolib jamoa xakatonda ishlab chiqilgan loyihani takomillashtirish va amalga oshirishga yordam beradigan 100 ming dollar miqdoridagi grantga ega boʻldi.

O‘zbekiston IPv6 Kengashi tashkil etildi

Sammitdan asosiy maqsad – IPv6 protokolini joriy etish bo‘yicha xalqaro tashkilotlar va kompaniyalar o‘zaro tajriba almashish, O‘zbekistonda IPv6 protokolini joriyni etishni qo‘llab-quvvatlashdan iborat. Sammit doirasida O‘zbekiston IPv6 Kengashi tashkil etilgani e’lon qilindi.

Tadbirda “IPv6 Forum”, “RIPE NCC”, “Huawei Technologies Co. Ltd”, “IETF IAB”, “UMS”, “Uzbektelekom” kabi xalqaro va mahalliy kompaniya va tashkilotlar vakillari ishtirok etib, ekspertlar tomonidan o‘z taqdimotlarida 50 dan ortiq soha mutaxassislari, tahlilchilar va ommaviy axborot vositalari xodimlari bilan o‘z bilim va tajribalari, fikrlari va fikr-mulohazalari bilan o‘rtoqlashdilar.

Anjuman doirasida IPv6 protokolini amaliyotga joriy etish va integratsiya qilish bo‘yicha yetakchi xorijiy kompaniyalar va mamlakatlar tajribasi, erishilgan yutuqlar, duch kelinadigan muammolar, istiqbolli loyihalar va ushbu yo‘nalishdagi imkoniyatlar muhokama qilindi.

“IT Education Forum”

AKT haftaligi doirasida O‘zbekistonda IT ta’lim sohasidagi asosiy va muhim voqealardan biri bo‘lgan – “IT Education Forum”i bo‘lib o‘tdi.

Forum davomida “Coursera” kompaniyasining bosh direktori video murojaat yo‘llab, ayni vaqtda O‘zbekistondan “Coursera” platformasi orqali ta’lim oladigan o‘quvchilar soni 3 barobarga oshganini ta’kidladi hamda bunda IT Park Uzbekistanning hissasi kattaligini ham qayd etdi.

Shuningdek, “Coursera” buyurtmachilar bilan ishlash bo‘yicha menejeri (AQSH) Sidxartxa Nagar “Young Talent and Global Skills” mavzusidagi o‘z taqdimoti bilan qatnashdi.

Shuningdek, Coursera platformasida o‘qib eng ko‘p sertifikatlarni qo‘lga kiritgan TOP-5 yoshlarni taqdirlandi.

Forumda Aloqabank tomonidan joriy etilgan “Student ID-Card” loyihasini qo‘llab-quvvatlagan universitet rektorlari va eng yaxshi natija ko‘rsatgan talabalarni mukofotlash jarayoni ham bo‘lib o‘tdi.

IT-ta’lim va raqamli texnologiyalari sohasida tashabbus ko‘rsatgan eng yaxshi hudud ham munosib taqdirlandi.

“Sun’iy intellekt kelajagi va global integratsiya” sammiti

Tadbirda “UZINFOCOM”, “KOIIA”, “Sber”, “VEON AdTech”, “Yandex”, “Amazon”, “Huawei”, “Foxconn”, “Presight AI”, “Markaziy Osiyo sun’iy intellekt uyushmasi”, O’zbekiston Axborot va ommaviy kommunikatsiyalar agentligi kabi kompaniya va tashkilotlarning sun’iy intellekt yo‘nalishida faoliyat olib boruvchi rahbarlari va ekspertlari taqdimotlari orqali o‘z bilim va tajribalarini, fikr va mulohazalarini 300 dan ortiq soha mutaxassislari, talaba-yoshlar hamda OAV xodimlari bilan baham ko‘rdilar.

Anjuman doirasida yetakchi xorijiy kompaniyalar va mamlakatlarning raqamli texnologiyalar va sun’iy intellektni amaliyotga joriy etishdagi tajribasi, erishilgan yutuqlar, kuzatilgan muammolar, ushbu yo‘nalishdagi istiqbolli loyihalar va imkoniyatlar muhokama qilindi.

Jahon Bankining “O‘zbekistonda elektron tijorat bozorida qanday muvaffaqiyatga erishish mumkin” mavzusida forumi

Haftalik doirasida Jahon bankining elektron tijoratni rivojlantirish guruhi (EGATE)ning yetakchi mahalliy va xalqaro ekspertlari ishtirokida “O‘zbekistonda elektron tijorat bozorida qanday muvaffaqiyatga erishish mumkin” forumi tashkil etildi.

Forumda Amazon, Mastercard, Alibaba, DHL, Uzum, USAID kompaniyalari vakillari, shuningdek, O‘zbekiston va Markaziy Osiyoning boshqa mamlakatlari, AQSh, Xitoy, Hindiston, Turkiya, Singapur va Yevropa davlatlaridan ekspertlar ishirok etdi.

Tadbirda onlayn savdo, moliyaviy to‘lovlar, logistika sohasi mutaxassislari qatnashib, O‘zbekistonda elektron tijoratni rivojlantirish istiqbollarini muhokama qildilar.

Sessiyalar davomida tajriba almashish, elektron tijorat sohasidagi imkoniyatlar, muammolar va yechimlar muhokama qilindi.

“Techno Women” harakatining O‘zbekistondagi faoliyati boshlandi hamda Fransiyaning “Women In Tech” loyihasiga ham start berildi

Ayollarga bag‘ishlangan “Empowering Women in IT: Leading the Digital Revolution” tadbiri o‘tkazildi.

Tadbirda HP Inc. EMEA jamoasida Hukumat ishlari va davlat siyosati boʻlimida Markaziy Osiyodagi yetakchi Diana Ryan, Techno Women ayollar harakatining prezidenti Aziza Shujeyeva, Raqamli texnologiyalar vaziri maslahatchisi Kamola Sobirova, shuningdek, chet-el va mahalliy nufuzli mehmonlar ishtirok etdi.

Oliy Majlisi Senati raisi Tanzila Norboyeva tadbir ishtirokchilariga onlayn video murojaat yo‘lladi. 

tadbiri doirasida ayollarga bag‘ishlangan “Empowering Women in IT: Leading the Digital Revolution” tadbiri o‘tkazildi.

Tadbirda HP Inc. EMEA jamoasida Hukumat ishlari va davlat siyosati boʻlimida Markaziy Osiyodagi yetakchi Diana Ryan, Techno Women ayollar harakatining prezidenti Aziza Shujeyeva, Raqamli texnologiyalar vaziri maslahatchisi Kamola Sobirova, shuningdek, chet-el va mahalliy nufuzli mehmonlar ishtirok etdi.

Oliy Majlisi Senati raisi Tanzila Norboyeva tadbir ishtirokchilariga onlayn video murojaat yo‘lladi. 

Sessiya doirasida Qozog‘istonning “Techno Women” hamda O‘zbekistonning IT-ta’lim uyushmasi o‘rtasida memorandum imzolanib, “Techno Women” harakatining O‘zbekistondagi faoliyati boshlandi.

Tadbirning yana bir muhim qismidan biri – bu endilikda Fransiyaning “Women in Tech” loyihasining O‘zbekistondagi faoliyatiga ham start berildi.

“O‘zbekiston – Koreya AKT Biznes hamkorlik” forumi

Haftalik doirasida koreyalik hamkorlar, KOICA, NIPA, UNIDO Korea va KOIIA bilan hamkorlikda birinchi “O‘zbekiston – Koreya AKT biznes hamkorligi” forumi bo‘lib o‘tdi. Biznes forum yigirmadan ortiq Koreya IT-kompaniyalarini qamrab oldi va forumda bir qator B2B uchrashuvlari o‘tkazildi.

Forumni UNIDO Korea direktori Maeng-ho Shin ochib berdi. U o‘z nutqida globallashuv jarayonida AKT sohasining hal qiluvchi roli, innovatsiyalar va iqtisodiy o‘sishni ta’minlash yo‘lida birgalikdagi sa’y-harakatlar zarurligi haqida fikr bildirdi.

Shundan so‘ng KOICA markazining O‘zbekistondagi direktori Shin Myung Seop O‘zbekiston va Koreya o‘rtasidagi hamkorlik salohiyati haqida nutq so‘zladi. U har ikki davlatning texnologik taraqqiyot uchun qulay muhit yaratish bo‘yicha umumiy qarashlar va maqsadlarga erishish uchun o‘zaro hamkorlikni rag‘batlantirish bo‘yicha gapirib o‘tdi. 

Forumning diqqat markazida mahalliy va Koreya IT-kompaniyalari o‘rtasidagi B2B uchrashuvlar bo‘ldi. Ushbu uchrashuvlar kelgusida har ikki mamlakatning IT-kompaniyalari uchun samarali munozaralar olib borish, salmoqli hamkorlikni o‘rganish va mazmunli aloqalarni o‘rnatish uchun platforma bo‘lib xizmat qiladi.

Janubiy Koreya axborot texnologiyalari sohasida O‘zbekistonning azaliy hamkori bo‘lib, bu tashabbuslar ikki davlat xususiy sektorlari o‘rtasidagi munosabatlarni rivojlantirishga qaratilgan.

Mobil aloqa abonentlariga o‘z mobil raqamlarini saqlagan holda o‘zlari xohlagan mobil aloqa operatori xizmatlaridan foydalanish imkoniyati yaratildi

ICTWEEK UZBEKISTAN – 2023” axborot-kommunikatsiya texnologiyalari haftaligi doirasida O‘zbekiston Respublikasi mobil aloqa tarmoqlarida abonent raqamini ko‘chirish xizmati (MNP) ishga tushirildi.

Xizmatning ishga tushirilishi mamlakatimizda faoliyat yuritib kelayotgan mobil aloqa operatorlari o‘rtasida sog‘lom, ijobiy raqobatni yanada kuchaytirish bilan birga ular tomonidan ko‘rsatilayotgan xizmatlar sifatining oshishiga olib keladi.

Uning qulayligi shundaki, endilikda abonentlar mobil aloqa operatorlarining xizmat ko‘rsatish sifatiga qarab istalgan kompaniyani tanlashi mumkin.

Hozirgi kunda O‘zbekistonda Beeline, Mobi.uz, Ucell, UZTELECOM, Humans kabi 5 ta mobil aloqa operatori faoliyat ko‘rsatadi. Ular tomonidan mijozlarga mobil aloqa xizmatlari ko‘rsatib kelinmoqda. Agar xizmatdan foydalanib, mobil aloqa operatori o‘zgartirilsa, ko‘chirilgan raqamlar o‘z shaklini va ko‘rinishini saqlab qoladi.

Jismoniy shaxslar xorijdan oʻzi bilan ikkita mobil qurilmani olib kirish imkoniyati yaratilib, UZIMEI tizimida ro‘yxatga olishda shaxsni biometrik identifikatsiya (Face-ID) qilish tizimi joriy etildi

Ushbu qulaylik orqali fuqarolarning shaxsga doir ma’lumotlaridan o‘zgalar foydalanishining oldi olinadi. Mazkur texnologiya yordamida jismoniy shaxs o‘ziga tegishli mobil qurilmalarni ro‘yxatga olishni o‘zining biometrik ma’lumotlaridan foydalangan holda onlayn tarzda amalga oshiradi. Bunda, jismoniy shaxs IMEI kodlarini ro‘yxatga olishni rasmiy veb-sayt (uzimei.uz), Yagona interaktiv davlat xizmatlari portali va uning mobil talqini hamda tizim ro‘yxatga oluvchilariga bevosita murojaat qilgan holda biometrik identifikatsiya orqali amalga oshirishi mumkin.

Shuningdek, yurtimizga xizmat safari yoki turizm uchun kelayotgan xorijiy fuqarolar mobil qurilmalaridan ro‘yxatdan o‘tkazmasdan foydalanish davri amaldagi 30 kalendar kunidan 60 kalendar kunigacha uzaytirildi.