“O‘zbekiston Respublikasi Vazirlar Mahkamasi Kubogi” kibersport turniri g‘oliblari aniqlandi
2024-12-26 11:45:00 / Vazirlik yangiliklari
O‘zbekiston Respublikasi Prezidentining 2022-yil 16-noyabrdagi “Kibersport turlarini yanada rivojlantirish va keng ommalashtirishga oid qo‘shimcha chora-tadbirlar to‘g‘risida”gi PQ-423-sonli qarori doirasida mamlakatda kibersportning xavfsiz rivojlanishini ta’minlash, yoshlar o‘rtasida ommalashtirish va professional kibersportchilarni tarbiyalash maqsadida keng ko‘lamli chora-tadbirlar amalga oshirilmoqda. Shu jumladan, kibersport musobaqalarini tashkil etish va iqtidorli yoshlarni aniqlashga alohida e’tibor qaratilmoqda.
Shu maqsadda joriy yilning 25-dekabr kuni “O‘zbekiston Respublikasi Vazirlar Mahkamasi Kubogi” kibersport turnirining final bellashuvlari o‘tkazildi.
Mazkur turnir yoshlar o‘rtasida kibersportga bo‘lgan qiziqishni oshirish bilan birga, mamlakatimizda axborot texnologiyalari va IT-industriyani rivojlantirishga ko‘maklashadi. Ushbu musobaqa iqtidorli kibersportchilarni aniqlash, ularni qo‘llab-quvvatlash va xalqaro maydonga olib chiqish uchun kuchli poydevor yaratmoqda.
Bu yilgi turnir Oʻzbekiston Respublikasining Raqamli texnologiyalar vazirligi, Sport vazirligi, Elektron kompyuter sporti federatsiyasi hamda Kibersport assotsiatsiyalari tomonidan tashkil etildi.
Final bosqichida uchta asosiy yo‘nalish – CS:GO (Counter-Strike 2), Mobile Legends: Bang Bang va PUBG Mobile bo‘yicha eng kuchli jamoalar o‘zaro bellashdilar.
Turnirning umumiy sovrin jamg‘armasi 150 million so‘mni tashkil etdi va bu har bir yo‘nalish bo‘yicha g‘oliblarni moddiy jihatdan rag‘batlantirish imkonini berdi.
Yakunda quyidagi jamoalar g‘oliblikni qo‘lga kiritdi:
CS:GO (Counter-Strike 2):
• 1-o‘rin: “Blaze” (Toshkent sh.) – 30 mln. so‘m
• 2-o‘rin: “Gamepoint Esports” (Namangan) – 15 mln. so‘m
• 3-o‘rin: “Octazone” (Toshkent sh.) – 5 mln. so‘m
PUBG Mobile (TDM rejimi):
• 1-o‘rin: “NOT X UWW TDM” (Toshkent) – 30 mln. so‘m
• 2-o‘rin: “UPG” (Andijon) – 15 mln. so‘m
• 3-o‘rin: “Dark Nights” (Toshkent viloyati) – 5 mln. so‘m
Mobile Legends: Bang Bang:
• 1-o‘rin: “Seven Hights” (Toshkent) – 30 mln. so‘m
• 2-o‘rin: “Besh Barmaq” (Navoiy) – 15 mln. so‘m
• 3-o‘rin: “Reagh of Fear” (Toshkent sh.) – 5 mln. so‘m
O‘zbekistonda kibersport ekotizimini yanada rivojlantirish va xalqaro miqyosda raqobatbardosh sportchilarni yetishtirish bo‘yicha ishlar davom etadi. Bu yo‘lda tashkilotchilar yangi loyihalarni amalga oshirish va kibersport musobaqalarini tizimli ravishda o‘tkazish rejasi belgilab berilgan.
“O‘zbekiston Respublikasi Vazirlar Mahkamasi Kubogi” kabi tadbirlar mamlakatimiz yoshlariga yangi imkoniyatlar eshigini ochib, ularni kelajakda kibersport sohasida yuqori natijalarga erishishiga yo‘l ochmoqda.