Toshkentda ilk bor Yandex Cup’ning final bosqichi o‘tkazilmoqda
2024-12-03 17:40:00 / Vazirlik yangiliklari
Bu nufuzli musobaqa Toshkentdagi CAEX ko‘rgazma majmuasida bo‘lib o‘tmoqda. Unda 18 mamlakatdan 200 nafar eng iqtidorli dasturchilar ishtirok etmoqda.
Raqamli texnologiyalar vaziri Sherzod Shermatov tadbir ochilishida so‘zga chiqib, chempionat ishtirokchilari va mehmonlarga O‘zbekistonda IT sohasidagi imkoniyatlar haqida ma’lumot berdi. Vazir o‘z nutqida yosh dasturchilarni xalqaro hamkorlikka chaqirdi va bu kabi tadbirlarning mamlakatning raqamli salohiyatini rivojlantirishdagi ahamiyatini ta’kidladi.
Yandex Cupning Toshkentda o‘tkazilishi bizning IT sohasidagi imkoniyatlarimizni butun dunyoga ko‘rsatish uchun muhim platforma bo‘lib xizmat qilishini qo‘shimcha qildi.
Yandex Cup – bu turli mamlakatlardan kelgan ishtirokchilarni dasturlash, matematika, analitika va sun’iy intellekt kabi sohalarda birlashtiradigan xalqaro tanlovdir. Bu yilgi chempionatga dunyoning 90 davlatidan 20 mingdan ortiq dasturchi ariza topshirgan. Final bosqichiga esa faqat eng kuchli dasturchilar yo‘l oldi.
Musobaqada qatnashchilar quyidagi oltita yo‘nalish bo‘yicha bellashadi:
• Analitika,
• Front-end dasturlash,
• Back-end dasturlash,
• Mobil dasturlash,
• Machine Learning,
• Algoritmik dasturlash (sport yo‘nalishi).
Final bosqichi murakkab topshiriqlardan iborat bo‘lib, unda eng yaxshi natija ko‘rsatgan dasturchilar sovrinlarni qo‘lga kiritadi.
Musobaqaning umumiy sovrin jamg‘armasi 1,95 milliard so‘mni tashkil etadi. Tadbirning final bosqichini jonli efirda kuzatish, tomoshabinlar yandex.ru/cup/2024 saytidan havola orqali ulanishlari mumkin.
Yandex Cupning Toshkentda o‘tkazilishi O‘zbekistonning xalqaro IT hamjamiyatidagi o‘rnini mustahkamlashga qaratilgan yana bir qadamdir. Ushbu musobaqa nafaqat yosh dasturchilar uchun, balki butun mamlakat uchun IT sohasidagi imkoniyatlarni kengaytirishga xizmat qiladi.