O‘zbekiston Respublikasi Raqamli texnologiyalar vazirligi

Ijtimoiy soha va iqtisodiyot tarmoqlarida sun’iy intellekt texnologiyalarini joriy qilish uchun qulay shart-sharoitlar yaratish, mamlakatimizning sun’iy intellekt texnologiyalaridan foydalanuvchi dunyoning yetakchi davlatlari qatoriga kirishini ta’minlash, shuningdek, “Raqamli O‘zbekiston – 2030” Strategiyasida belgilangan maqsad va vazifalar ijrosini ta’minlash maqsadida: O‘zbekiston Respublikasi Prezidentining “Sun’iy intellekt texnologiyalarini 2030-yilga qadar rivojlantirish strategiyasini tasdiqlash to‘g‘risida” (PQ–358-son, 14.10.2024 y.) qarori qabul qilindi.

Ushbu qaror mamlakatimizda sun’iy intellekt texnologiyalarini yaratishga qaratilgan bo‘lib, qarorning maqsadi inson manfaatlarini ustuvor qilib, yangi texnologiyalarni rivojlantirish orqali fuqarolar turmush sifatini yaxshilashdan iborat.

Mazkur qaror bilan Sun’iy intellekt texnologiyalarini 2030-yilga qadar rivojlantirish strategiyasi tasdiqlandi.

Shuningdek, Sun’iy intellekt texnologiyalarini 2030-yilga qadar rivojlantirish bo‘yicha erishish lozim bo‘lgan maqsadli ko‘rsatkichlar ham belgilandi: 

Shu jumladan:

– sun’iy intellekt asosida yaratilgan dasturiy mahsulotlar va ko‘rsatiladigan xizmatlar hajmini 1,5 mlrd AQSH dollariga yetkazish;

– yagona interaktiv davlat xizmatlari portalida sun’iy intellekt asosida ko‘rsatilayotgan xizmatlar ulushini 10 foizga yetkazish;

– sun’iy intellekt yo‘nalishida faoliyat yurituvchi ilmiy laboratoriyalar sonini 10 taga yetkazish hamda yuqori quvvatli hisoblash serverlarini ishga tushirish;

– hukumatning sun’iy intellektga tayyorlik indeksida (Government AI Readiness Index) O‘zbekiston Respublikasini birinchi 50 ta o‘rindagi davlatlar qatoriga kirishiga erishish belgilandi.

Shu bilan birga, sun’iy intellekt texnologiyalarini rivojlantirish bo‘yicha ustuvor maqsad va vazifalar ham belgilandi:

– sun’iy intellekt texnologiyalari rivojlantirishga qaratilgan normativ-huquqiy bazani shakllantirish, sohada standartlarni takomillashtirish va hamkorlik aloqalarini mustahkamlash;

– ma’lumotlarni qayta ishlash hamda sun’iy intellektga asoslangan loyihalarni ishga tushirish uchun texnik infratuzilmani yaratish, ijtimoiy soha va iqtisodiyot tarmoqlarida mazkur yo‘nalishdagi ustuvor loyihalarni amalga oshirish; 

– sun’iy intellekt texnologiyalaridan foydalanish bo‘yicha aholining bilim va ko‘nikmalarini oshirish, kadrlar salohiyatini rivojlantirish.

Mazkur qaror asosida Sun’iy intellekt texnologiyalarini rivojlantirish strategiyasini 2024–2026 yillarda amalga oshirish bo‘yicha chora-tadbirlar rejasi va Ijtimoiy va Iqtisodiyot tarmoqlarida shakllantiriladigan “katta ma’lumotlar” ro‘yxati tasdiqlandi.

Sun’iy intellekt texnologiyalarini joriy etish bo‘yicha ustuvor yo‘nalishlar ham belgilandi:

– bank-moliya sohasida – firibgarliklarning oldini olish, foydalanuvchilarning to‘lov qobiliyatini baholash, bozor tendensiyalarini prognoz qilish;

– soliq va bojxona sohalarida – yashirin iqtisodiyot ulushini kamaytirish, shubhali bojxona operatsiyalarini prognozlash va xavflarni boshqarish;

– sog‘liqni saqlash sohasida – kasalliklarni tashxislash, davolash usullarini belgilash, tibbiy tasvirlarni tahlil qilish va bemorga oid ma’lumotlarini boshqarish;

– qishloq xo‘jaligi sohasida – hosildorlikni prognoz qilish, qishloq xo‘jaligi resurslarini boshqarish;

– energetika sohasida – energiya resurslarini boshqarish, energiya ishlab chiqarish va taqsimlashni optimallashtirish, qayta tiklanadigan energiya manbalaridan foydalanishni rivojlantirish va ularga bo'lgan talabni prognozlash.