INMerge Innovation Summitʼda Central Asian Innovation Hubs
2024-10-12 11:55:00 / Vazirlik yangiliklari
Bokuda “PASHA Holding” tomonidan tashkil etilgan “INMerge Innovation Summit” boshlandi. Bu tadbir startaplar va investorlarni birlashtirish, hamkorlik va gʻoyalar almashinuvi uchun noyob imkoniyatlar yaratish orqali innovatsion ekotizimni rivojlantirishga qaratilgan. Sammit ishtirokchilar orasida innovatsiyalarni tezlashtirish uchun platforma vazifasini oʻtamoqda.
Koʻrgazmada birinchi marta joriy yilning sentyabr oyida IT Park Uzbekistan va “Astana Hub” tashabbusi bilan tuzilgan “Central Asian Innovation Hubs” texnoparklar alyansi taqdim etildi. Ushbu alyans doirasida Markaziy Osiyodan sakkizta startap oʻz loyihalarini namoyish etdi va investorlar uchun pitchingda qatnashdi.
IT Park Uzbekistan bosh direktori Farhod Ibragimov: “Markaziy Osiyo mintaqasi texnologiyalar va innovatsiyalar sohasida ulkan salohiyatga ega. Central Asian Innovation Hubs mintaqaning eng yaxshi startaplarini birlashtirish va ularga xalqaro resurslar hamda investitsiyalardan foydalanish imkoniyatini berish uchun tashkil etilgan. Birgalikdagi saʼy-harakatlarimiz bilan Markaziy Osiyoning jahon texnologik maydonidagi oʻrnini yaxshilashimizga ishonaman”, deya taʼkidladi.
“Astana Hubs bosh direktori Magjan Madiyev qoʻshimcha qildi: “INMerge Innovation Summit biz uchun hamkorlik va rivojlanishning yangi ufqlarini ochmoqda. Markaziy Osiyo IT ekotizimini rivojlantirish uchun noyob imkoniyatlarga ega. “Central Asian Innovation Hubs” orqali mintaqamizni texnologik innovatsiyalarning kuchli markaziga aylantirishga intilyapmiz. Bu shunchaki investitsiyalarni jalb qilish emas, balki xalqaro aloqalarni yoʻlga qoʻyish, yangi bozorlar ochish va ilgʻor texnologiyalar almashinuvi haqida. Biz Markaziy Osiyoning startaplar va IT-mutaxassislar uchun jahon darajasidagi markazga aylanishiga ishonamiz va bunday sammitlarda ishtirok etish bu maqsad sari qoʻyilgan qadam hisoblanadi. Kuchlarimizni birlashtirish orqali mintaqamizni global oʻyinchilar va investorlarni jalb qiladigan dinamik va innovatsion markazga aylantira olamiz.”
Taqdim etilgan startaplar orasida:
- OSON — moliyaviy qulaylik va integratsiyani yaxshilashga qaratilgan tezkor va qulay toʻlovlar platformasi.
- RBoffice — kompaniyalarning ichki operatsiyalarini optimallashtiruvchi biznes jarayonlarini boshqarish uchun bulutli yechim.
- TRIDMO — arxitektorlar, dizaynerlar va muhandislar uchun foydali boʻlgan 3D modellar va animatsiyalarni yaratish uchun yechimlarni taklif qiluvchi 3D dizayn va prototiplash sohasidagi startap.
- IOTICS — maʼlumotlarni tahlil qilish va boshqarishni soddalashtirgan holda oʻzaro bogʻlangan va xavfsiz qurilmalar tarmoqlarini yaratish uchun yechimlarni taqdim etuvchi Internet of Things (IoT) platformasi.
- pwron.ai — ekspertlar koʻmagi bilan tezkor, maʼlumotlarga asoslangan bozor tadqiqotlarini taqdim etuvchi tadqiqot va strategiyalarni ishlab chiqish uchun AI yordamchisi. Mahsulot biznesga strategik qarorlarni optimallashtirish imkonini beradi.
- BEKSAR — chakana savdoda kichik va oʻrta biznesni raqamlashtirishga qaratilgan qozogʻistonlik startap. Kompaniya yechimlari savdoni kuzatish va zaxiralarni boshqarish jarayonlarini avtomatlashtirish, shuningdek, moliyalashtirishdan foydalanish imkoniyatini taʼminlaydi.
- MultiCode — yuk vagonlari operatorlari uchun B2B SaaS boʻlib, 80 000 dan ortiq vagonning ilgʻor texnologiyalar yordamida rentabelligini oshirishga koʻmaklashmoqda.
- BeyimTech AI — Oʻquvchilar va oʻqituvchilar uchun sunʼiy intellektdan foydalangan holda moslashtirilgan mikro taʼlim platformasi.
Startaplar Paynet.az, Azercell, Greenpay, Pasha Bank, Pasha Pay, Holberton va boshqa loyihalar bilan muzokaralar olib bordi. Ushbu tadbirda ishtirok etish orqali startaplar potensial investorlar va hamkorlar eʼtiborini tortdi, moliyalashtirish va strategik hamkorlik uchun yangi imkoniyatlar paydo boʻldi.
“Central Asian Innovation Hubs”ning bunday darajadagi xalqaro sammitlarda ishtiroki investitsiyalarni jalb qilish, innovatsion texnologiyalarni rivojlantirish va mintaqaning jahon maydonidagi oʻrnini mustahkamlashga xizmat qilmoqda.