IT Park Uzbekistan, Cintana Education va Arizona State University oʻrtasidagi hamkorlik: mamlakatning kadrlar salohiyatini rivojlantirish sari qadam
2024-10-04 18:05:00 / Vazirlik yangiliklari
IT Park Uzbekistan bosh direktori Farhod Ibragimov rahbarligidagi vakillari Amerika delegatsiyasi bilan uchrashuv oʻtkazdi. Delegatsiya tarkibida “Cintana Education” asoschisi Duglas Bekker hamda “Watts College of Public Service and Community Solutions” qoshidagi “Public Affairs School” professori va “Cintana Education” prezidenti Rik Shongrou bor edi. Uchrashuvda Toshkentdagi “American University of Technology” (AUT) hammuassisi va kengash aʼzosi Timur Rahmonov ham ishtirok etdi.
“American University of Technology” — Oʻzbekistondagi ikkinchi Amerika oliy taʼlim muassasasi boʻlib, u “Arizona State University” va “Cintana Education” bilan hamkorlikda tashkil etilgan. Bu hamkorlik oʻtgan yil sentyabr oyida Nyu-Yorkda Oʻzbekiston Respublikasi Prezidenti Shavkat Mirziyoyev va Duglas Bekker oʻrtasida erishilgan kelishuvlar natijasida yuzaga kelgan. Universitet allaqachon oʻz faoliyatini boshlagan va 2024/2025 oʻquv yili uchun talabalarni qabul qilmoqda.
Uchrashuv davomida mehmonlarga Oʻzbekistonning texnologik muhiti va mamlakatda IT-biznesni rivojlantirish uchun yaratilgan sharoitlar haqida batafsil maʼlumot berildi.
Uchrashuvning asosiy jihatlaridan biri AQSH xususiy sektori vakillari bilan hamkorlikni muhokama qilish boʻldi. “AUT” Oʻzbekistondagi qoʻshma loyihalar uchun Amerikaning yetakchi kompaniyalarini jalb qilishni rejalashtirmoqda. Bu mahalliy startaplar va autsorsing IT-xizmatlari ekotizimini rivojlantirishga yordam beradi.
Bundan tashqari, tomonlar “AUT” va IT Park Uzbekistan oʻrtasidagi hamkorlik aloqalarini rivojlantirish yoʻnalishlarini muhokama qildilar. Taʼlim tashabbuslariga, jumladan, qoʻshma akseleratsiya dasturlari va texnologik laboratoriyalarni yaratishga alohida eʼtibor qaratildi.
“IT Park University” (ITPU) bilan hamkorlikda ilmiy tadqiqotlar va ishlanmalar sohasida qoʻshma loyihalarni amalga oshirish ham rejalashtirilmoqda. Tomonlar ilmiy baza va amaliy tajribani birlashtirgan holda axborot texnologiyalari bozori uchun ilgʻor yechimlarni yaratishda hamkorlik qilishga intilmoqda. Duglas Bekker ITPU bilan hamkorlikda ish beruvchi tomonidan qoʻshimcha tayyorgarliksiz ishchi loyihalarga darhol jalb etishga tayyor boʻlgan mutaxassislarni tayyorlashga yoʻnaltirilgan taʼlim yondashuvini ishlab chiqishga tayyorligini bildirdi.
Tomonlar muzokaralarning ikkinchi bosqichini oʻtkazishga kelishib oldilar. Unda hamkorlikning keyingi qadamlari belgilab olinadi.
“Cintana Education” va “Arizona State University” bilan potensial hamkorlik Oʻzbekistonning global bozordagi kadrlar salohiyatini rivojlantirishda muhim qadam boʻlishi kutilmoqda. Ushbu hamkorlik oʻzbekistonlik mutaxassislarga yetakchi amerikalik ekspertlardan bilim va tajriba olish imkonini beradi. Bu esa ularning xalqaro miqyosda talabgorligini va raqobatbardoshligini sezilarli darajada oshiradi.