O‘zbekiston Respublikasi Raqamli texnologiyalar vazirligi

Raqamli texnologiyalar vaziri Sherzod Shermatov Toshkent axborot texnologiyalari universitetiga tashrifi davomida xorijlik talabalar bilan uchrashib, ularning ta’lim olish jarayoni, universitetda yaratilgan sharoitlar va raqamli texnologiyalar sohasidagi qiziqishlari bilan yaqindan tanishdi.

Ochiq muloqot shaklida o‘tgan suhbatda talabalar o‘zlari tahsil olayotgan yo‘nalishlar, TATUni tanlash sabablari hamda O‘zbekistonda ta’lim olish tajribasi haqida so‘zlab berdilar. Ular universitetda xorijiy talabalar uchun yaratilgan imkoniyatlar, zamonaviy o‘quv bazasi, amaliy mashg‘ulotlar va AT sohasida bilim va ko‘nikmalarni rivojlantirish uchun mavjud sharoitlar haqida fikr bildirdi.

Muloqot davomida raqamli texnologiyalar sohasida yuz berayotgan jadal o‘zgarishlar, sun’iy intellekt, dasturiy ta’minot, telekommunikatsiyalar va boshqa zamonaviy yo‘nalishlarda malakali mutaxassislarga bo‘lgan talab ortib borayotgani haqida ham fikr almashildi. Talabalar o‘zlarini qiziqtirgan savollar bilan vazirga murojaat qilib, ta’lim va kasbiy rivojlanish bo‘yicha taklif hamda mulohazalarini bildirdi.

Vazir xorijlik yoshlarning O‘zbekistonda tahsil olayotgani mamlakatning ta’lim va raqamli texnologiyalar sohasida xalqaro aloqalari kengayib borayotganining muhim ko‘rinishlaridan biri ekanini qayd etdi

Shuningdek, talabalarni universitetda olayotgan nazariy bilimlarini amaliyot bilan uyg‘unlashtirish, zamonaviy texnologiyalarni muntazam o‘rganib borish va kelajakda xalqaro darajada raqobatbardosh mutaxassis bo‘lishga intilishga chaqirildi.

Uchrashuv yakunida xorijlik talabalar TATUda tahsil olish uchun yaratilgan imkoniyatlar va O‘zbekistondagi ta’lim muhiti haqida ijobiy fikrlarini bildirib, vazirga muloqot uchun minnatdorlik bildirdi.