O‘zbekiston Respublikasi Raqamli texnologiyalar vazirligi

Osiyo taraqqiyot banki tomonidan O‘zbekistonda gender tengligini ta’minlash va xotin-qizlar imkoniyatlarini kengaytirishga bag‘ishlangan davra suhbati o‘tkazildi.

Tadbir davomida O‘zbekiston bo‘yicha Mamlakat gender baholovi (Country Gender Assessment) natijalari taqdim etilib, shuningdek, ADB tomonidan ishlab chiqilayotgan Gender tengligi va xotin-qizlar imkoniyatlarini kengaytirish siyosati loyihasi muhokama qilindi.

Davra suhbatini ADBning O‘zbekistondagi doimiy vakolatxonasi direktori Kanokpan Lao-Araya ochib berdi. U ADB O‘zbekistonda gender tengligi, xotin-qizlarning iqtisodiy va ijtimoiy imkoniyatlarini kengaytirish hamda inklyuziv rivojlanishni qo‘llab-quvvatlashga alohida e’tibor qaratayotganini ta’kidladi.

Tadbirda vazirlik va idoralarning gender tenglik masalalari bo‘yicha maslahatchilari, Gender tenglik bo‘yicha kengash a’zolari hamda ushbu yo‘nalish uchun mas’ul mutaxassislar ishtirok etdi. Jumladan, Oʻzbekiston sogʻliqni saqlash vazirining birinchi oʻrinbosari, Elmira Bositxonova, Raqamli texnologiyalar vaziri maslahatchisi Kamola Sobirova ham davra suhbatida qatnashdi.

K. Sobirova nutqi davomida mamlakatimizda raqamli transformatsiya jarayonida jinsidan qat’i nazar, har bir fuqaro zamonaviy raqamli ko‘nikmalarga ega bo‘lishi va onlayn xizmatlardan to‘laqonli foydalana olishi muhimligini ta'kidladi.

“Bugun mehnat bozorida yangi ish o‘rinlarini yaratayotgan AT kompaniyalar professional va zamonaviy ko‘nikmalarga ega mutaxassislarga tobora ko‘proq ehtiyoj sezmoqda. Texnologik kasblarda insonning jinsi emas, uning bilimi, salohiyati va kasbiy ko‘nikmalari hal qiluvchi ahamiyatga ega.

Shu nuqtai nazardan, qizlarni zamonaviy va talab yuqori bo‘lgan kasblarni egallashga rag‘batlantirish, ularning iqtisodiy imkoniyatlarini kengaytirish, munosib daromad topishi va mehnat bozorida o‘z o‘rnini topishi uchun muhim qadamdir. Zamonaviy bilim va ko‘nikmalarga ega mutaxassislar esa munosib ish o‘rinlarida o‘z salohiyatini namoyon etishi va yuqori daromadli kasblarda faoliyat yuritishi mumkin”, – dedi K. Sobirova.

Muhokamalar davomida O‘zbekistonda gender tengligini ta’minlash borasidagi mavjud holat, xotin-qizlarning iqtisodiyot va mehnat bozoridagi ishtirokini kengaytirish, zamonaviy kasblarga jalb etish, shuningdek, raqamli texnologiyalar va innovatsiyalar orqali ular uchun yangi imkoniyatlar yaratish masalalariga e’tibor qaratildi.