O‘zbekiston Respublikasi Raqamli texnologiyalar vazirligi

Yig‘ilishda Koreya va Markaziy Osiyo davlatlarida sun’iy intellekt hamda raqamli texnologiyalarni rivojlantirish borasida amalga oshirilayotgan ishlar, mavjud imkoniyatlar va istiqboldagi hamkorlik yo‘nalishlari muhokama qilindi.

Tadbirda O‘zbekistonning 2030-yilgacha Sun’iy intellektni rivojlantirish strategiyasi, shuningdek, mamlakatda sun’iy intellekt sohasini rivojlantirish, ilg‘or texnologiyalarni joriy etish va sohadagi loyihalarni amalga oshirish bo‘yicha olib borilayotgan ishlar haqida ma’lumot berildi.

Shu bilan birga, sun’iy intellekt texnologiyalaridan inson manfaatlariga xizmat qiladigan, mas’uliyatli va samarali tarzda foydalanish muhimligi ta’kidlandi.

Yig‘ilish davomida Koreyaning yetakchi sun’iy intellekt kompaniyalari, ilmiy-tadqiqot va ta’lim muassasalari bilan hamkorlikni yanada kengaytirish, qo‘shma tadqiqotlarni yo‘lga qo‘yish, ta’lim dasturlarini amalga oshirish hamda texnologik loyihalarni birgalikda ishlab chiqish bo‘yicha tashabbuslar ilgari surildi.

Tadbir yakunida “Koreya – Markaziy Osiyo: Kelajakdagi sun’iy intellekt, ilm-fan va texnologiyalar sohalaridagi hamkorlik tashabbusi” qabul qilindi.