O‘zbekiston sun’iy intellekt sohasida hamkorlik bo‘yicha Butunjahon tashkiloti (WAICO)ning hamta’sischilaridan biriga aylandi
2026-07-16 19:15:00 / Vazirlik yangiliklari
Konferensiya doirasida, bugun, 16-iyul kuni “Sun’iy intellekt sohasida hamkorlik bo‘yicha Butunjahon tashkilotini (WAICO) tashkil etish to‘g‘risidagi Bitim”ni imzolash marosimi boʻlib oʻtdi. Unda BMT Bosh kotibi Antoniu Guterrish, tashkilotning ta’sischi davlatlari tashqi ishlar vazirlari va rasmiy delegatsiyalari, xalqaro tashkilotlar va diplomatik korpus vakillari ishtirok etdi.
Imzolash marosimida O‘zbekiston nomidan Raqamli texnologiyalar vaziri Sherzod Shermatov qatnashdi.
Mazkur tashkilot sun’iy intellektni rivojlantirish bo‘yicha xalqaro hamkorlikni kengaytirish, ilg‘or texnologiyalar almashinuvini yo‘lga qo‘yish hamda sun’iy intellektdan xavfsiz va mas’uliyatli foydalanishga oid umumiy yondashuvlarni shakllantirishni maqsad qilgan.
O‘zbekiston ham ushbu tashabbusga qo‘shilib, WAICO’ning hamta’sischilaridan biriga aylandi.
Bu mamlakatning sun’iy intellekt sohasidagi xalqaro hamkorligini yanada kengaytirish, global AI ekotizimidagi ishtirokini mustahkamlash hamda ilg‘or tajriba va texnologiyalarni jalb etish yo‘lidagi muhim qadam bo‘lishi kutilmoqda.