Sun’iy intellekt va raqamli texnologiyalar bo‘yicha xalqaro konferensiya bo‘lib o‘tdi
2026-06-20 12:35:00 / Vazirlik yangiliklari
Nurafshon shahridagi “Cyber University” davlat universitetida “2026 Information Technologies and Artificial Intelligence International Conference” xalqaro ilmiy-amaliy konferensiyasi o‘tkazildi.
Nufuzli anjumanda O‘zbekiston, Rossiya, Turkmaniston va boshqa davlatlardan 100 dan ortiq olimlar, soha ekspertlari, AT-mutaxassislar hamda davlat tashkilotlari vakillari ishtirok etdi.
Tadbir sun’iy intellekt, kiberxavfsizlik va raqamli texnologiyalar yo‘nalishidagi ilmiy tadqiqotlar natijalarini muhokama qilish, tajriba almashish hamda xalqaro hamkorlikni kengaytirishga xizmat qildi.
Konferensiya doirasida kompyuter lingvistikasi va tabiiy tilni qayta ishlash, kiberxavfsizlik va sun’iy intellekt, shuningdek, raqamli ta’lim va innovatsiyalar yo‘nalishlarida sessiyalar tashkil etildi.
Unda o‘zbek va qoraqalpoq tillari uchun sun’iy intellekt yechimlari, zamonaviy kiberxavfsizlik tizimlari, virtual laboratoriyalar, IoT texnologiyalari hamda ta’lim jarayonlariga innovatsion yondashuvlar yuzasidan taqdimotlar o‘tkazildi.
Shuningdek, “Sun’iy intellekt universitetlarda: fan, ta’lim va IT-industriya hamkorligi uchun yangi model” mavzusidagi panel muhokamasida oliy ta’lim muassasalari, AT-kompaniyalar va ilmiy markazlar o‘rtasidagi hamkorlikning istiqbollari muhokama qilindi.
Ikki kun davom etgan konferensiya davomida 40 dan ortiq ilmiy ma’ruzalar tinglandi, ishtirokchilar o‘rtasida tajriba almashinuvi yo‘lga qo‘yildi hamda sun’iy intellekt va raqamli texnologiyalar sohasida yangi hamkorlik tashabbuslari ilgari surildi.