O‘zbekiston va SPbDTU telekommunikatsiya hamda kiberxavfsizlik sohasida qo‘shma ta’lim va ilmiy loyihalarni rivojlantiradi
2026-06-05 18:45:00 / Vazirlik yangiliklari
Uchrashuv davomida raqamli ta’lim, ilmiy tadqiqotlar, 5G/6G texnologiyalari, sun’iy intellekt va kiberxavfsizlik yo‘nalishlaridagi hamkorlik istiqbollari muhokama qilindi. Tomonlar zamonaviy telekommunikatsiya va axborot texnologiyalari sohalari uchun yuqori malakali mutaxassislar tayyorlash masalalariga alohida e’tibor qaratdilar.
Muzokaralar yakunida SPbDTU, Toshkent axborot texnologiyalari universiteti hamda Cyber University o‘rtasidagi hamkorlikni kengaytirish, ikki tomonlama diplom dasturlarini yo‘lga qo‘yish, o‘zbekistonlik talabalar uchun magistratura va PhD dasturlaridagi imkoniyatlarni kengaytirish bo‘yicha ishlarni davom ettirishga kelishib olindi.
Shuningdek, kelajak avlod aloqa tarmoqlari, radiochastota spektrini boshqarish tizimlari hamda telekommunikatsiya texnologiyalari bo‘yicha qo‘shma ilmiy-tadqiqot markazini tashkil etish istiqbollari muhokama qilindi.
Tashrif doirasida vazir universitetda tahsil olayotgan o‘zbekistonlik talabalar bilan ham uchrashib, ularning ta’lim olishi va yashash sharoitlari bilan tanishdi hamda talabalarni qiziqtirgan savollarga javob berdi.
Delegatsiya universitetning kiberxavfsizlik, radioaloqa, media texnologiyalar va innovatsion telekommunikatsiya yechimlariga ixtisoslashgan zamonaviy laboratoriyalari hamda ilmiy markazlari faoliyati bilan ham yaqindan tanishdi.
Mazkur hamkorlik telekommunikatsiya, axborot xavfsizligi va raqamli texnologiyalar sohalari uchun xalqaro darajadagi mutaxassislarni tayyorlash, qo‘shma ilmiy loyihalarni amalga oshirish hamda O‘zbekistonning ilmiy-ta’lim salohiyatini yanada mustahkamlashga xizmat qiladi.