“Mirzo Ulug‘bek vorislari” 2023/2024-о‘quv yili bitiruvchilarini taqdirlash tadbiri bo‘lib o‘tdi
2024-06-28 18:05:00 / Vazirlik yangiliklari
Tayyorlov o‘quv kurslariga barcha oliy ta’lim muassasalarining bakalavriat yo‘nalishining 2-bosqichini muvaffaqiyatli tamomlagan talabalardan kursga qabul qilingan 60 nafar talabalar “Mirzo Ulug‘bek vorislari” tayyorlov o‘quv kurslarini muvaffaqiyatli tamomladilar.
Mazkur kursning maqsadi tinglovchilarga “Data Science” bo‘yicha ta’lim berilib, davlat organlari va tashkilotlari uchun matematik statistika, dasturiy ta’minot asosida ma’lumotlarni qayta ishlash, ular asosida boshqaruv qarorlarini tayyorlash bo‘yicha o‘zining ilmiy asoslangan takliflarni ishlab chiqa oladigan mutaxassislar tayyorlashdan iboratdir.
Bugun, 28-iyun kuni Iste’dodli yoshlarni qо‘llab-quvvatlash “Ulug‘bek” jamg‘armasi, Raqamli texnologiyalar vazirligi, Oliy ta’lim, fan va innovatsiyalar vazirligi, Toshkent shahridagi Inha universiteti hamda Toshkent shahridagi Amity universiteti bilan hamkorlikda “Mirzo Ulug‘bek vorislari” 2023/2024-о‘quv yili bitiruvchilarini taqdirlash bayram-tadbiri bo‘lib o‘tdi.
Unda Iste’dodli yoshlarni qо‘llab-quvvatlash “Ulug‘bek” jamg‘armasi raisi O. Salimov, Raqamli texnologiyalar vaziri Sh. Shermatov, Oliy ta’lim, fan va innovatsiyalar vaziri K. Sharipov ishtirok etdi.
Tadbirda, shuningdek, markaz mutaxassislari, talabalarihamda Oliy ta’lim muassasalarining prorektorlaridan iborat jami 300 nafarga yaqin ishtirokchi qatnashdi.
Tadbirda so‘zga chiqqan Raqamli texnologiyalar vaziri Sh. Shermatov Mirzo Ulug‘bek vorislari tayyorlov о‘quv kursi bitiruvchilarini kelajakda kuchli mutaxassis bо‘lib yetishishlariga ishonch bildirdi hamda ushbu kursni davom ettirib, yoshlarimizning zamonaviy kasblarni egallashlari uchun bilim olishdan to‘xtamasliklarini, aqliy zakovatini oshirib boraverishlari, yurtimiz ravnaqi uchun kata hissa qo‘shadigan yoshlar bo‘lib yetishishlarini tiladi.
O‘quv kursining asosiy vazifalari etib quyidagilar belgilangan edi va bugun shu maqsadlarga erishildi:
– Jumladan, ilg‘or xorijiy tajriba va milliy ta’lim standartlari talablariga javob bera oladigan matematik statistika va dasturiy ta’minot asosida ma’lumotlarni qayta ishlash va ular asosida takliflarni ishlab chiqish qobiliyatiga ega kadrlarni tayyorlash;
– raqamli texnologik yechimlar orqali amaliy ko‘nikmalarni shakllantirish hamda davlat organlari va tashkilotlarining axborot tizimlarini integratsiya qilish bo‘yicha malakali mutaxassislarni tayyorlash;
– iqtisodiy va ijtimoiy yo‘nalishlarda resurslarni taqsimlash va qayta taqsimlash jarayonlarini tahlil qilish, ma’lumotlarni qayta ishlashda raqamli yechimlardan foydalanish bo‘yicha boshlang‘ich darajadagi mutaxassislarni tayyorlash.
– Qarorga asosan tanlov uch bosqichda, birinchi bosqich – onlayn ariza va IQ test (onlayn test) topshirish, ikkinchi bosqich – imtihon, uchinchi bosqich – suhbat shaklida o‘tkazilgan.
Ushbu o‘quv kurslari uchun qabul keyingi yillarda ham davom etadi.