Raqamli texnologiyalar vaziri MIT Kuo Sharper Center bilan hamkorlik masalalarini muhokama qildi
2026-02-21 08:50:00 / Vazirlik yangiliklari
MIT Kuo Sharper Center for Prosperity and Entrepreneurship vakillarining O‘zbekistonga tashrifi doirasida O‘zbekiston Respublikasi Raqamli texnologiyalar vaziri Sherzod Shermatov va Markaz ijrochi direktori Dina Sherif o‘rtasida uchrashuv bo‘lib o‘tdi. Tomonlar mamlakatning startap va DeepTech ekotizimini rivojlantirish, shuningdek, xalqaro ilmiy-texnologik hamkorlikni kengaytirishga qaratilgan strategik sheriklik istiqbollarini muhokama qildilar.
Muzokaralarning asosiy mavzusi O‘zbekistonning innovatsion ekotizimi va infratuzilmasini tizimli rivojlantirishni ta’minlashga qaratilgan hamkorlikdagi uzoq muddatli dasturni shakllantirish bo‘ldi.
Uchrashuvda mamlakatda startap ekotizimini rivojlantirish uchun mustahkam poydevor yaratilgani ta’kidlandi: bugungi kunda O‘zbekistonda 750 dan ortiq startap faoliyat yuritmoqda, ulardan 147 dan ortig‘i mahalliy va xalqaro investitsiyalarni jalb qilgan. O‘zbekiston global startap ekotizimlarining top-100 taligiga kirdi va Markaziy Osiyodagi eng tez rivojlanayotgan texnologik xab hisoblanadi.
O‘zbekistonda sun’iy intellekt, robototexnika, ilg‘or ishlab chiqarish texnologiyalari, energetika yechimlari va avtonom tizimlar kabi ustuvor yo‘nalishlarda ilmiy-tadqiqot markazlarini tashkil etish tashabbusiga alohida e’tibor qaratildi. Shuningdek, texnologik yo‘naltirilgan tarmoqlar uchun ta’lim dasturlari va kadrlar salohiyatini rivojlantirish, jumladan, qo‘shma akademik va kasbiy tashabbuslar muhokama qilindi.
Uchrashuv yakunida tomonlar O‘zbekistonning texnologik tadbirkorlik sohasidagi yuqori salohiyatini ta’kidlab, mamlakatning global innovatsion ekotizimga integratsiyalashuviga qaratilgan uzoq muddatli hamkorlikka tayyor ekanliklarini bildirdilar.