O‘zbekiston Respublikasi Raqamli texnologiyalar vazirligi

Raqamli texnologiyalar vazirligida vazir Sherzod Shermatov rahbarligida vazirlik hamda uning tizimidagi korxona va tashkilotlarda “Davlat tili haqida”gi Qonun ijrosining ta’minlanishi, davlat tili me’yorlariga amal qilish holati yuzasidan Hay’at majlisi o‘tkazildi. Unda davlat tiliga oid qonunchilik hujjatlari ijrosini kuchaytirish, o‘zbek tilining davlat tili sifatidagi mavqeini oshirish hamda ish yuritishda belgilangan talab va me’yorlarga qat’iy rioya etish masalalari ko‘rib chiqildi.

Majlisda ushbu yo‘nalishda amalga oshirilayotgan ishlar, tizim tashkilotlarida mas’ullar faoliyati hamda hujjatlarni davlat tili me’yorlariga moslashtirish bo‘yicha ko‘rilayotgan chora-tadbirlar yuzasidan axborotlar tinglandi. Shuningdek, davlat tilining zamonaviy axborot texnologiyalari bilan uyg‘unlashuvi, sun’iy intellekt imkoniyatlaridan samarali foydalanish, o‘zbek tili resurslarini rivojlantirish kabi masalalar muhim vazifa ekani qayd etildi.

Yig‘ilish yakunida vazirlik va tizim tashkilotlari rahbarlariga hujjatlarni davlat tilida, lotin yozuviga asoslangan o‘zbek alifbosida rasmiylashtirish amaliyotini izchil davom ettirish, normativ-huquqiy hujjatlar loyihalarini kelishishdan oldin til me’yorlari bo‘yicha ko‘rikdan o‘tkazish, davlat tilida ish yuritish bo‘yicha xodimlar malakasini oshirish hamda soha atamalarini yagona yondashuv asosida takomillashtirib borish yuzasidan tegishli topshiriqlar berildi. Shuningdek, davlat tiliga hurmat va muomala madaniyatini kuchaytirish, rasmiyatchilikka yo‘l qo‘ymaslik hamda belgilangan vazifalar ijrosini doimiy nazoratda ushlab borish muhimligi alohida ta’kidlandi.