Raqamli hukumat: davlat xizmatlarida yangi sifat va yangi sur’at – yangi bosqichda
2026-01-29 09:05:00 / Vazirlik yangiliklari
Yagona interaktiv davlat xizmatlari portali imkoniyatlari kengaymoqda
Yagona interaktiv davlat xizmatlari portalida 2025-yilda 100 ta yangi elektron xizmat joriy etilib, xizmatlarning umumiy soni 800 taga yetkazildi. Bu ko‘rsatkich 2017-yilda bor yo‘g‘i 60 ta edi.
Bugungi kunda Yagona portaldan ro‘yxatdan o‘tgan foydalanuvchilar soni 13 milliondan oshgani raqamli davlat xizmatlariga bo‘lgan talab yildan-yilga ortib borayotganini ko‘rsatadi.
Mobil ilovalar orqali xizmatlardan foydalanish jadal o‘smoqda
Yagona portalning mobil ilovasida 75 ta yangi elektron xizmat joriy etilib, ularning umumiy soni 600 taga yetdi. Mobil ilova orqali foydalanuvchilar soni 9,5 milliondan oshib, 2024-yil yakunidagi 4 million ko‘rsatkichga nisbatan sezilarli o‘sish qayd etildi.
2025-yilning yanvar–sentabr oylarida Yagona portal orqali taqdim etilgan xizmatlar soni 39,4 milliondan oshdi. Ayniqsa, yilning 3-choragida kredit tarixini olishga cheklov o‘rnatish, jismoniy shaxslarni davlat tibbiyot muassasalariga hisobga qo‘yish, avtomobil gaz uskunalarini o‘rnatish uchun ruxsatnoma olish hamda ovchilik guvohnomasini rasmiylashtirish xizmatlariga talab yuqori bo‘ldi.
Elektron xizmatlarni ko‘rsatish nuqtalari kengaymoqda
Elektron xizmatlarni yanada ommalashtirish maqsadida 30 ta tijorat banklari, onlayn to‘lov tizimlari va mobil operatorlar ilovalari orqali 33 ga yaqin xizmatlarni ko‘rsatish imkoniyati yaratildi. Natijada ushbu xizmatlardan jami 2 million martadan ortiq foydalanildi.
Shu bilan birga, davlat xizmatlari uchun to‘langan davlat bojlari va yig‘imlar hisobini yurituvchi Yagona billing tizimiga 75 ga yaqin tashkilotlarning 595 ta xizmati ulandi. Bu to‘lov hujjatlarini shakllantirishni soddalashtirib, moliyaviy jarayonlar shaffofligini ta’minladi. Yagona billing tizimi orqali davlat xizmatlari uchun to‘langan umumiy summa 16,6 trillion so‘mni tashkil etdi.
Elektron hukumatning bazaviy axborot tizimlari takomillashtirildi
Elektron hukumatning Yagona identifikatsiya tizimi takomillashtirilib, foydalanuvchilar soni 2025-yil yakunida 13,1 millionga yetdi. Hozirda ushbu tizimga davlat idoralarining 1200 dan ortiq axborot tizimlari integratsiya qilingan (2025-yil 920 ta).
Idoralararo integratsiyalashuv platformasi orqali 2025-yilning to‘qqiz oyida 5,1 milliard marotaba so‘rovlar qayta ishlandi. Bu o‘tgan yil ko‘rsatkichiga nisbatan 182 foiz o‘sishni tashkil etdi. Platformadagi servislar soni yil yakunida 530 taga yetkazildi.
Ma’lumotnomalar va klassifikatorlar registriga 23 ta tashkilot tomonidan 112 ta klassifikator kiritilib, o‘tgan yilga nisbatan 181 foiz o‘sishga erishildi. Shuningdek, axborot tizimlari va resurslarining yagona reestri ishga tushirilib, 247 ta davlat organining 1293 ta axborot tizimlari ro‘yxatga olindi.
Ijro intizomi va infratuzilmada samaradorlik oshdi
Yagona idoralararo ijro intizomi tizimi asosida ishlayotgan Edo.ijro.uz platformasida foydalanuvchilar soni 150 mingdan oshdi. Tizim orqali 62 milliondan ortiq hujjatlar raqamli shaklda yaratildi, 32 milliondan ortiq topshiriqlar nazoratga olindi. Bu esa 853 tonna qog‘ozni tejash, shu bilan birga rahbar va xodimlar vaqtidan samarali foydalanish imkonini berdi.
Toshkent viloyatida Elektron hukumatning ma’lumotlarni qayta ishlash markazi tashkil etildi. Unda 80 ta tashkilotning 250 ta yangi axborot tizimi joylashtirildi.
Shu bilan birga, O‘zbekiston Respublikasi Hukumat portali negizida davlat organlari axborot resurslarining yagona platformasi ishga tushirilib, 285 dan ortiq davlat organlarining rasmiy veb-saytlari ushbu platformaga o‘tkazildi.
Erishilgan natijalar Raqamli hukumat tizimi O‘zbekistonda davlat boshqaruvi samaradorligini oshirish, aholi va biznes uchun xizmatlarni yanada yaqin va qulay qilishda muhim omilga aylanganini yaqqol namoyon etmoqda. Raqamli transformatsiya jarayoni izchil davom etib, kelgusida davlat xizmatlarining sifati va qamrovi yanada kengayishi kutilmoqda.