O‘zbekiston Respublikasi Raqamli texnologiyalar vazirligi

Asosiy maqsad qizlar o‘rtasida IT sohasi imkoniyatlarni keng targ‘ib qilish, ushbu sohada faoliyat olib borayotgan qizlarni qo‘llab-quvvatlash, o‘zaro aloqa o‘rnatish va tajriba almashishlari uchun imkoniyat yaratish orqali qizlarni raqamli texnologiyalar sohasiga keng jalb qilishdan iborat bo‘lgan “IT Star” tanloviga respublikamizning turli hududlaridan 700 dan ortiq arizalar kelib tushdi. 

Tanlov natijalariga ko‘ra, iqtidorli loyiha menejerlari, marketolog, dasturchi, grafik dizayner, IT rekruter, frilanser, IT sohasi bilan bog‘liq har qanday yo‘nalishda faoliyat yuritadigan kasb egalari (jurnalistlar, yurist, talaba, o‘quvchi, tadqiqotchi, muhandis va boshqalar) 46 ta nominatsiyada taqdirlandi.

IT Ladies hamjamiyati rezidentlari, IT ta’lim uyushmasi, IT Community Uzbekistan vakillaridan iborat hakamlar hay’ati tomonidan amalga oshirilgan baholash jarayonida qizlarning erishgan yutuqlari, amalga oshirgan loyihalari dolzarbligi, jamiyatdagi faolliklari inobatga olindi.

Marosim doirasida Huawei kompaniyasi Yaqin Sharq va Markaziy Osiyo mamlakatlari yoshlari o‘rtasida o‘tkaziladigan navbatdagi “Seed for the Future — 2024” ta’lim loyihasi O‘zbekistonda bo‘lishini e’lon qildi. Loyiha 2024-yilning avgust oyiga mo‘ljallangan bo‘lib, mintaqadagi 15 dan ortiq mamlakatdan 150 nafar talabalarni birlashtirishga mo‘ljallangan.

 “Seed for the Future – 2024” mintaqaviy dasturida ilg‘or texnologiyalar va yechimlarni o‘rganish, sohaning yetakchi mutaxassislari, O‘zbekiston madaniyati va an’analari bilan tanishish, shuningdek, har yili o‘tkaziladigan Tech4Good tanlovi bilan bog‘liq bir haftalik bir qator tadbirlarni o‘z ichiga oladi.

Tantanali marosim so‘ngida IT sohasining yetakchi ekspertlari tomonidan qizlar uchun IT-sohasidagi imkoniyatlar xilmaxilligi, o‘qish va ishni uyg‘unlashtirish, boshqaruv lavozimidagi ayollarning yo‘li hamda shaxsiy brendni rivojlantirish kabi qizqarli mavzularda ma’ruzalar qilindi.