Qoraqalpog‘istonda Modulli Intellektual Hisoblash Markazini qurish bo‘yicha harakatlar rejasi imzolandi
2025-11-30 10:55:00 / Vazirlik yangiliklari
O‘zbekiston Respublikasi Prezidentining “Sun’iy intellekt texnologiyalarini yanada rivojlantirishga oid qo‘shimcha chora-tadbirlar to‘g‘risida” 2025-yil 22-oktabrdagi PF–189-son Farmoniga muvofiq, data markazlar faoliyatiga bir qator imtiyozlar berilgan. Shunga muvofiq Raqamli texnologiyalar vazirligida Qoraqalpog‘iston Respublikasi Vazirlar Kengashi Raisi Farhod Ermanov, Raqamli texnologiyalar vaziri Sherzod Shermatov hamda “Shanghai LinkWise Data Intelligence Co., Ltd” kompaniyasi ta’sischisi Wang Xuhui boshchiligidagi delegatsiya o‘rtasida uchrashuv bo‘lib o‘tdi.
Uchrashuvda dastlab Modulli Intellektual Hisoblash Markazini (MIHM) barpo etish bo‘yicha olib borilayotgan ishlar, loyihaning strategik ahamiyati va infratuzilmaviy talablar batafsil muhokama qilindi. Tomonlar qurilish jarayonlari, zamonaviy texnik yechimlar va markazning samarali faoliyat ko‘rsatishi uchun zarur infratuzilmaviy shart-sharoitlar haqida fikr almashdilar. Loyihaning mamlakatimiz uchun raqamli iqtisodiyotni rivojlantirish, yuqori texnologiyalar sohasida imkoniyatlar yaratish va mahalliy investitsiyalarni jalb etish nuqtai nazaridan ahamiyati alohida ta’kidlandi.
Uchrashuvning yana bir muhim yo‘nalishi Qoraqalpog‘iston Respublikasida mahalliy talantlar va mutaxassislar salohiyatini oshirish bo‘ldi. Xususan, hududda yangi ish o‘rinlarini yaratish, mahalliy yoshlarni yuqori texnologiyalar sohasiga jalb qilish va ularni zamonaviy raqamli yo‘nalishlar bo‘yicha tayyorlash masalalari muhokama qilindi. Shu bilan birga, yosh mutaxassislar uchun qo‘llab-quvvatlash dasturlarini ishlab chiqish va ularni professional rivojlanish imkoniyatlari bilan ta’minlash bo‘yicha takliflar bildirildi.
Tomonlar, shuningdek, mahalliy universitetlar va ta’lim muassasalari bilan hamkorlik qilish zarurligini qayd etdilar.
Uchrashuv yakunida tomonlar MIHM loyihasi nafaqat texnologik infratuzilmani rivojlantirishi, balki Qoraqalpog‘iston Respublikasida yangi bilimlar, malakalar va yuqori texnologik ekotizimni shakllantirishga xizmat qilishini qayd etdilar. Shu maqsadda, Modulli Intellektual Hisoblash Markazini qurish bo‘yicha harakatlar rejasi imzolandi.
Ushbu rejaga muvofiq birinchi bosqichda 60 megavattlik, ikkinchi bosqichda esa 240 megavattlik, jami 300 megavattlik data markaz barpo etilishi rejalashtirilgan.