O‘zbekiston Respublikasi Raqamli texnologiyalar vazirligi

O‘zbekiston Respublikasi Prezidentining “Raqamli texnologiyalar xalqaro markazi faoliyatini tashkil etish to‘g‘risida”gi PF–233-son farmoni qabul qilindi.

Farmon “Raqamli O‘zbekiston – 2030” strategiyasida belgilangan vazifalarni amalga oshirish, dasturiy mahsulotlar va IT-xizmatlar eksportini rivojlantirish uchun qulay shart-sharoitlar yaratish, xorijiy investitsiyalarni keng jalb etish hamda investorlar huquqlarini himoya qilishning xalqaro tan olingan ilg‘or amaliyotlarini joriy etish maqsadida qabul qilindi.

Farmonda IT sohasiga investitsiyalarni jalb qilish, raqobatbardosh ekotizimni shakllantirish, venchur kapitalini jalb qilishda huquqiy kafolatlarni mustahkamlash, raqamli xizmatlar eksportini rivojlantirish, innovatsiyalar va kadrlar tayyorlashni rag‘batlantirish hamda xorijiy investorlar uchun qulay huquqiy muhit yaratishga qaratilgan vazifalar belgilandi.

Raqamli texnologiyalar xalqaro markazi faoliyati va boshqaruvi 2024-yil 1-fevraldagi PF–25-son farmonga muvofiq “Enterprise Uzbekistan” raqamli texnologiyalar xalqaro markazi tashkil etilgani ma’lumot uchun qabul qilindi.

Markaz direksiyasi aksiyadorlik jamiyati shaklida tashkil etiladi va uning yagona aksiyadori sifatida “Dasturiy mahsulotlar va axborot texnologiyalari texnologik parki direksiyasi” MCHJ belgilandi. 

Markaz rezidentlari uchun soliq, bojxona, mehnat munosabatlari, shaxsiy ma’lumotlar va intellektual mulkni himoya qilish, davlat xizmatlari ko‘rsatish va nizolarni hal etish sohalarida maxsus huquqiy rejim belgilanadi.

Markaz hududida quyidagi faoliyat turlariga ruxsat etiladi:

– dasturiy mahsulotlarni ishlab chiqish, raqamli texnologiyalar sohasida konsalting va autstaffing xizmatlarini ko‘rsatish;

– raqamli texnologiyalardan foydalangan holda autsorsing asosida masofaviy xizmatlar ko‘rsatish, shu jumladan, biznes jarayonlar autsorsingi (BPO);

– raqamli texnologiyalar sohasida ilmiy tadqiqotlar va ishlanmalarni (R&D) amalga oshirish;

– video o‘yinlar (GameDev) yaratish, ular uchun raqamli kontent ishlab chiqish, jumladan, grafik dizayn, video va audio kontent yaratish va tahrirlash (shu jumladan, vizualizatsiya va raqamli media);

– raqamli kontentni (shu jumladan elektron kitoblar, o‘quv kurslari, media-kontent) yoki dasturiy yechimlarni onlayn platformalar orqali yaratish, joylashtirish va targ‘ib qilish;

– sun’iy intellekt texnologiyalarini yaratish va rivojlantirish;

– ma’lumotlarni qayta ishlash va saqlash markazlarini, bulutli hisoblash tizimlarini yaratish, ularni boshqarish va tegishli xizmatlarni ko‘rsatish;

– raqamli texnologiyalar sohasida ta’lim faoliyatini va Boshqaruv kengashi tomonidan belgilanuvchi boshqa faoliyat turlarini amalga oshirish.

Markaz rezidentlari faoliyati Markaz hududi va uning yurisdiksiyasida amalga oshiriladi. Shu maqsadda hududda “yagona darcha” tamoyili asosida, shu jumladan, ingliz tilida xizmat ko‘rsatuvchi ixtisoslashtirilgan soliq inspeksiyasi tashkil etiladi.

Farmonda Markazni Angliya va Uels umumiy huquq normalariga yoki yetakchi xalqaro moliya markazlari standartlariga asoslangan maxsus yurisdiksiya sifatida e’tirof etish belgilandi. Shuningdek, Markaz rezidentlari bilan bog‘liq nizolarni O‘zbekiston sud tizimiga kirmaydigan mustaqil ixtisoslashtirilgan sudda ko‘rib chiqish imkoniyati yaratiladi.

Shu bilan birga, rezident bo‘lmagan kompaniyalarga Markaz hududida xizmatlar ko‘rsatishga, ularga soliq va bojxona imtiyozlari tatbiq etilmagan holda, ruxsat etiladi.