O‘zbekistonda “IT-visa” berish tartibi yanada takomillashtiriladi – Vazirlar Mahkamasi qarori
2025-11-22 10:20:00 / Vazirlik yangiliklari
“O‘zbekiston – 2030” strategiyasiga muvofiq raqamlashtirish sohasidagi chet ellik nufuzli oliy ta’lim muassasalarining ilmiy xodimlari va xalqaro startap loyihalar ishtirokchilarini O‘zbekistonga jalb qilish orqali IT xizmatlar eksportini oshirish maqsadida, “Raqamli texnologiyalar sohasida mutaxassislarni tayyorlash tizimini yo‘lga qo‘yish hamda chet ellik mutaxassislarga “IT-visa” berish tartibi takomillashtirilishi munosabati bilan O‘zbekiston Respublikasi Hukumatining ayrim qarorlariga o‘zgartish va qo‘shimchalar kiritish to‘g‘risida” Vazirlar Mahkamasining 2025-yil 21-noyabrdagi 734-sonli qarori qabul qilindi.
Mazkur qarorga muvofiq quyidagilarni nazarda tutuvchi o‘zgartish va qo‘shimchalar kiritildi.
Jumladan,
– startap loyihalarning xorijiy ta’sischilari (ishtirokchilari) va mutaxassislariga hamda oliy ta’lim tashkilotlarining axborot texnologiyalari sohasida fan nomzodi, falsafa doktori (PhD) yoki fan doktori (DSc) ilmiy darajasiga ega bo‘lgan xorijlik professor-o‘qituvchilari, shuningdek, IT-park rezidenti maqomini olgan yuridik shaxsning yakkaboshchilik asosidagi ijro etuvchi organi vazifasini amalga oshiruvchi jismoniy shaxs yoki kollegial ijro etuvchi organining raisi hamda ularning o‘rinbosarlariga O‘zbekiston Respublikasiga kirish uchun “IT-visa” beriladi.
– IT sohasida eksport salohiyatini oshirish uchun xalqaro darajadagi malakali mutaxassislarni tayyorlash tizimi doirasida maqsadli qarzlar ajratish yo‘lga qo‘yiladi.