O‘zbekiston Respublikasi Investitsiyalar, sanoat va savdo vazirligi

O‘zbekiston Respublikasi Investitsiyalar, sanoat va savdo vazirligi muvofiqlashtiruvi ostida tashkil etilgan Toshkent xalqaro investitsiya forumining so‘nggi kunida O‘zbekistonning investitsiyaviy jozibadorligi muhokamalarning asosiy mavzularidan biri bo‘ldi. Xususan, "Yerga investitsiya: Buyuk Britaniya tajribasi, tuproq unumdorligi va Orol dengizini tiklash uchun investitsiyalarni safarbar etish" mavzusidagi panel sessiyasida yana bir muhim masala - O‘zbekiston yerlari unumdorligini saqlash va ulardan foydalanish samaradorligini oshirish masalasi ko‘tarildi.

Munozara Orol dengizining qurishi bilan bog‘liq ekologik inqirozni muhokama qilishga bag‘ishlandi. O‘n yillar davomida suv resurslarini samarasiz boshqarish natijasida uning zaiflashishi O‘zbekiston va qo‘shni mamlakatlarda cho‘llanish, aholi salomatligi bilan bog‘liq muammolar va ijtimoiy-iqtisodiy beqarorlikka olib keldi.

O‘zbekiston Respublikasi ekologiya, atrof-muhitni muhofaza qilish va iqlim o‘zgarishi vaziri o‘rinbosari Jusipbek Kazbekov O‘zbekistonning taraqqiyot strategiyasi barqaror rivojlanish va yashil o‘sishga asoslanganini ta’kidladi.

- Bu - milliy siyosatimizning yuragi. Shuningdek bizda keng ko‘lamli milliy dasturlar, xususan, "Yashil makon" tashabbusi doirasida har yili 200 million tup daraxt ekish rejalashtirilgan. Kuni kecha Prezident farmoni bilan O‘zbekiston Respublikasi Prezidenti huzurida Iqlim o‘zgarishi bo‘yicha Milliy markaz va Milliy iqlim kengashi tashkil etildi, - deya ma’lumot berdi Jusipbek Kazbekov.

Buyuk Britaniyaning O‘zbekistondagi elchisi Timoti Smart Orolni tiklash mumkinligi va Buyuk Britaniya ushbu maqsadga erishish uchun O‘zbekiston va mintaqaning boshqa davlatlari bilan yaqindan hamkorlik qilayotganidan faxrlanishini ta’kidladi.

Bu haqiqatan ham muhim sessiya - biz bu yerning kelajagi, bu yerda yashaydigan odamlar va barchamizga ta’sir ko‘rsatadigan iqlim haqida gaplashayapmiz. Orol dengizi uzoq vaqt davomida tabiat haddan tashqari bosim ostida qoldirilganda nima sodir bo‘lishini yaqqol eslatib turibdi. Ammo, u umid timsoliga ham aylanishi mumkin - bu yerda biz sa’y-harakatlarimizni birlashtiramiz, yangi yondashuvlarni qo‘llaymiz va yerning o‘zini ham, u bilan bog‘liq insonlar hayotini ham tiklashga investitsiya kiritamiz," - deya qo‘shimcha qildi Timoti Smart.

Sessiyaning asosiy maqsadi Buyuk Britaniyaning moliya institutlari, rivojlantirish tashkilotlari va innovatsion barqaror tashabbuslari Orolbo‘yi mintaqasini ekologik tiklash va Markaziy Osiyoda barqaror agroamaliyotlarni joriy etishga qanday hissa qo‘shishi mumkinligini muhokama qilishdan iborat.

Biroq Orol dengizi halokati ekologik fojia ramziga aylandi. O‘zbekiston uchun bu alohida ahamiyatga ega hodisa. Qishloq xo‘jaligi oqava suvlaridan tuz, pestitsidlar va kimyoviy o‘g‘itlar bilan ifloslangan dengizning yalang‘och tubi zaharli chang bo‘ronlarining manbasiga aylandi. O‘zbekiston taslim bo‘lmagani tahsinga loyiq. Hukumat Orolbo‘yi mintaqasini tiklashni davlat siyosatining ustuvor yo‘nalishiga aylantirdi. O‘zbekiston qishloq xo‘jaligi va atrof-muhit ehtiyojlari o‘rtasidagi murakkab muvozanatni topishga intiladi, qolgan deltalarga suv oqimini ta’minlaydi va barqaror qishloq xo‘jaligiga e’tibor qaratadi, shu bilan mintaqaning uzoq muddatli ekologik va iqtisodiy tiklanishiga zamin yaratadi, - dedi Buyuk Britaniya Lordlar palatasi a’zosi Lord Veyverli.

Standard Chartered Bank ijrochi direktori Lyusi Rahalning aytishicha, Agrobankka 250 million dollarlik yashil kredit ajratilgan. Ushbu bitimdan tushgan mablag‘lar agrosektorga, xususan, qishloq xo‘jaligida suvni tejaydigan zamonaviy va innovatsion texnologiya bo‘lgan tomchilatib sug‘orish loyihalariga yo‘naltiriladi.

- Nega bu haqda gapiryapman? Chunki agar biz Orol dengiziga yangi suv oqimlarini yo‘naltirmoqchi bo‘lsak va shu bilan birga uning atrofidagi agrar sohaga zarar yetkazmaslikni istasak, ushbu sohaning o‘ziga ham bunday texnologiyalardan foydalanish imkoniyatini ta’minlashimiz kerak. Ushbu bitim Standard Chartered Bank va boshqa banklarning to‘g‘ridan-to‘g‘ri bank krediti sifatida rasmiylashtirildi, - deya qo‘shimcha qildi Lyusi Rahal.

Panel muhokamasi davomida tuproq unumdorligi, iqlimga moslashtirilgan investitsiyalar va transchegaraviy hamkorlik masalalariga alohida e’tibor qaratilib, Buyuk Britaniyaning mintaqadagi eng o‘tkir ekologik inqirozlardan biriga ekologik yo‘naltirilgan va moliyaviy jihatdan qo‘llab-quvvatlangan yechimlarni taklif qila oladigan hamkor sifatidagi muhim roli ta’kidlandi