O‘zbekiston Respublikasi Investitsiyalar, sanoat va savdo vazirligi

Tadbirni Saviday kompaniyasining katta maslahatchisi Anjey Shafernaker boshqardi.

Sessiyada ishtirok quyidagi ma’ruzachilar ishtirok etdi:

- Azamat Oteuliyev, Qoraqalpog‘iston Respublikasi investitsiyalar va tashqi savdo vaziri

- Olimxon Rustamov, Qashqadaryo viloyati hokimi o‘rinbosari

- Oybek Hamrayev, Samarqand viloyati hokimi o‘rinbosari

- Sherali Jo‘rayev, Surxondaryo viloyati hokimining o‘rinbosari

- Najmiddinxo‘ja Sharipov, Toshkent viloyati hokimi o‘rinbosari

- Alisher Duschanov, Xorazm viloyati hokimligi vakili

- Bekmurod Akbarov, Sirdaryo viloyati investitsiyalar va tashqi savdo boshqarmasi boshlig‘i o‘rinbosari

O‘zbekistonga so‘nggi olti yilda 50 milliard dollardan ortiq xorijiy sarmoya jalb etildi. Uning qulay geografik joylashuvi, boy tabiiy resurslari va 37 million aholiga ega yirik ichki bozori ulkan sarmoyaviy salohiyatdan dalolat beradi.

Tadbirda hududlarda investitsiya loyihalarini muvaffaqiyatli amalga oshirishni davlat tomonidan qo‘llab-quvvatlashning zarur chora-tadbirlari hamda qulay investitsiya muhitini shakllantirish samaradorligiga ta’sir etuvchi omillar muhokama qilindi.

Hukumat tomonidan toʻgʻridan-toʻgʻri xorijiy investitsiyalar oqimini koʻpaytirish va butun mamlakat boʻylab biznes yuritish uchun maqbul sharoitlar yaratishga katta eʼtibor qaratilayotgani ma’ruzachilar tomonidan alohida qayd etildi.

Sessiyada 6 ta hudud — Qashqadaryo, Samarqand, Toshkent, Sirdaryo va Xorazm viloyatlari, shuningdek Qoraqalpog‘iston Respublikasidan vakillar o‘z hududida investorlar uchun yaratilgan imkoniyatlar haqida batafsil ma’lumot berdi.

Dastlab Qashqadaryo viloyati hokimi o‘rinbosari Olimxon Rustamov hududning investorlar uchun jozibador tomonlarini ochib berdi.

“Qashqadaryo juda ham qulay geografik joylashuvga ega hudud hisoblanadi. Viloyatda transport infratuzilmasi rivojlangan bo‘lib, bu biznes vakillari, xususan investorlar uchun ayni muddaodir. Hududning urbanizatsiya darajasi 42 foizni tashkil qiladi. Oliy ta’lim qamrovi esa so‘nggi yillarda 9 foizdan 47 foizga yetdi”, — deydi Rustamov.

Viloyatga 2023 yilning o‘zida 704 mln dollarlik xorijiy investitsiyalar kirib kelgan bo‘lib, Olimxon Rustamov 2024 yilda jalb qilingan investitsiyalar miqdorini 1 mlrd dollarni oshirish reja qilinayotganini ma’lum qildi. 2023 yil bo‘yicha xorijiy sarmoyalarning asosiy qismi Xitoy hisobiga to‘g‘ri keladi — 330,3 million dollar.

Bundan tashqari, Qashdaryoda aholi tes o‘sib borayotgani, har yili 100 mingta chaqaloq tug‘ilishi, buning ortidan qurilish ishlariga katta talab mavjudligi alohida ta’kidlandi. Viloyat hokimi o‘rinbosari har yili 20 mingta uy qurish uchun ehtiyoj borligini aytib, investorlarni bu sohaga e’tibor qaratishga chaqirdi.

Shundan keyin Samarqand hokimi o‘rinbosari Oybek Hamroyev so‘zga chiqib, Samarqand boy tarixga ega ekanini, O‘zbekistonga sarmoya kiritmoqchi bo‘lgan ko‘plab investorlar Samarqand haqida bilishini aytib o‘tdi.

“Samarqandning aholisi 4,2 million nafardan oshiq bo‘lib, viloyat bu bo‘yicha poytaxt — Toshkent shahridan ham oldindan hisobalanadi. Mineral resurslarga boy bo‘lgan hududning yalpi ichki mahsuloti so‘nggi yillarda xuddi O‘zbekiston kabi yaxshi sur’atlarda o‘sib bormoqda”, — deydi u.

Qoraqalpog‘iston Respublikasidan vakil Azamat Oteuliyev ushbu hudud G‘arb bozoriga eng yaqin ekanini ta’kidlab, investorlar uchun O‘zbekistonning boshqa qismida bo‘lmagan imkoniyatlarni sanab o‘tdi:

“Qoraqalpog‘iston Respublikasi to‘liq erkin iqtisodiy zona hisoblanadi. Bu hududda amalga oshirilgan har qanday loyiha soliq imtiyozlariga ega bo‘lishini anglatadi. Shuningdek, bu yerda davlat byudjeti mablag‘lari hisobidan investorlar uchun to‘liq infratuzilma yetkazib beriladi. Nafaqat xorijiy savdo aloqalari bo‘yicha, balki O‘zbekiston bo‘ylab transport xarajatlarining 70 foizgacha bo‘lgan qismi qoplab beriladi”.

Shuningdek, tadbir yakunida ma’ruzachilar tomonidan O‘zbekiston tez rivojlanayotgan mamlakatligi va investorlar uchun sarmoya kiritishning ayni vaqti ekani ta’kidlandi. Mamlakatning G‘arb va Sharqni bog‘lovchi hududga aylanayotgani, mintaqadagi eng katta aholisi borligi, hukumat investorlar uchun jozibador muhit yaratishga intilayotgani aytib o‘tildi.