O‘zbekiston Respublikasi Investitsiyalar, sanoat va savdo vazirligi

TXIF doirasida xalqaro ekspertlar va davlat tuzilmalari vakillari “Uzviylik: Buyuk Ipak yo‘lining qayta tiklanishi” nomli davra suhbatida qadimiy Ipak yo‘li marshrutlari bo‘yicha aloqalarni, iqtisodiy hamkorlikni va madaniy almashinuvni kengaytirish imkoniyatlarini o‘rgandilar.

— Biz, birinchi navbatda, iqtisodiyot va yangi transport yo‘nalishlari haqida bosh qotirmoqdamiz. Bu loyihaning amalga oshirilishi nafaqat O‘zbekistonga, balki barchaga foyda keltiradi. Masalaning muhim tomoni shundaki, bu o‘rinda boshqa davlatlarning qonunlari hamda madaniyatiga hurmat katta rol o‘ynaydi”, — dedi Transport vaziri o‘rinbosari Jasurbek Choriyev.

Tadbir moderatorligini CNNning boshlovchisi va muxbiri Richard Kvist olib bordi.

Davra suhbatida quyidagi spikerlar ishtirok etdilar:

• Erve Juvin, Yevropa parlamenti a’zosi

• Uilyam Tompson, OECDning Yevroosiyo bo‘limi rahbari

• Kris Uifer, “Micro-Advisory Limited” bosh direktori

• Sasha Parney, “Alstom”ning savdo va marketing bo‘yicha vitse-prezidenti

• Ilhom Mahkamov, O‘zbekiston Respublikasi Transport vaziri

Ishtirokchilar ushbu qadimiy savdo liniyasini zamonaviy davrga moslab qayta tiklash choralari, savdo-iqtisodiy aloqalarni kengaytirish, shuningdek, bir vaqtlar Ipak yo‘li bilan bog‘langan mamlakatlar o‘rtasida madaniy muloqotni rag‘batlantirish masalalarini muhokama qildilar.

Davra suhbatida Yangi Ipak yo‘li konsepsiyasini amalga oshirish uchun aniq qadamlar — xavfsiz va samarali transport koridorlarini ta’minlash, logistika infratuzilmasini rivojlantirish va mintaqa davlatlari o‘rtasida hamkorlikni rivojlantirish yo‘llari ko‘rib chiqildi.

Tadbir tarixiy tranzit tarmoqlarini qayta tiklash va Yevroosiyo mamlakatlarining uzoq muddatli farovonligi uchun strategik muloqot qurishda muhim platforma vazifasini bajardi.