Surxondaryo viloyati Uzun tumani hokimligi

Uzun  tumani mahallalarida xavfsiz muhitni yaratish Prezidentimizning PQ-1-son va PQ-2-son qarorlari ijrosi, “Chilonzor tajribasi” borasidagi ishlar atroflicha o‘rganilib, Davlat xavfsizlik xizmati boshlig‘i Aliyor Eshmatov, viloyat prokurori Baxtiyar Babadjanov hamda viloyat ichki ishlar boshqarmasi boshlig‘i Timur Ismailovlar rahbarligida viloyat va tuman mas’ullari ishtirokida muhokama qilindi.

Xususan, Prezidentimizning PQ-1 va PQ-2-son qarorlari ijrosi, “Chilonzor tajribasi” doirasida amalga oshirilayotgan ishlar, mahallalarda jinoyat va huquqbuzarliklarni oldini olish, ijtimoiy holati og‘ir hududlarni “jinoyatchilikdan xoli hudud”ga aylantirish, “og‘ir” toifadagi yoshlar bilan ishlash, xotin-qizlar o‘rtasida jinoyatlarning barvaqt oldini olish, oilaviy muhitni sog‘lomlashtirish, aholi bandligini ta’minlash kabi masalalar muhokama qilindi.

Shu bilan birga ko‘p qavatli turar-joy binolari va boshqa hududlarni kameralashtirish, qo‘riqqa olish, aholi uchun yaratilayotgan sharoitlar, surunkali ichkilikbozlikka, giyohvandlik va zaharvandlikka moyil shaxslarni davolash va reabilitatsiya qilish bo‘yicha bajarilgan ishlar ham muhokama qilindi.

Yig‘ilishda kriminogen vaziyati murakkab bo‘lgan mahallalarda faoliyat olib borayotgan “yettilik”ning amalga oshirayotgan ishlari va yo‘l qo‘ygan kamchiliklari tanqidiy ko‘rib chiqilib, ularni bartaraf etish bo‘yicha aniq vazifalar belgilab berildi.

Bu kabi tizimli va manzilli ishlar hududlarda tinchlik va osoyishtalikni ta’minlash, aholi farovonligini oshirish hamda mahallalarni xavfsiz hududga aylantirish yo‘lida muhim ahamiyat kasb etmoqda.