"O‘zbekkosmos" agentligi

So‘nggi yillarda kosmik texnologiyalar hududlarni barqaror rivojlantirish, resurslardan samarali foydalanish va boshqaruv qarorlarini qabul qilishda muhim vositaga aylanmoqda. Shu nuqtai nazardan, “O‘zbekkosmos” agentligi vakillarining Andijon va Namangan viloyatlari hokimlari Shuhratbek Abdurahmonov hamda Shavkatjon Abdurazzoqovlar bilan bo‘lgan uchrashuvi Vodiy hududlarida kosmik monitoring tizimlarini joriy etish va kengaytirish yo‘lida muhim qadam bo‘ldi.

Andijon va Namangan viloyatlari aholi zichligi yuqori, qishloq xo‘jaligi va sanoat salohiyati katta hududlar hisoblanadi. Bunday hududlarda yer, suv va infratuzilma resurslarini aniq hisobga olish va samarali boshqarish dolzarb masaladir. Kosmik texnologiyalar, xususan, sun’iy yo‘ldosh tasvirlari va masofadan zondlash ma’lumotlari bu borada aniq va tezkor tahlil imkonini beradi.

Kosmik monitoring yordamida yer maydonlarining holati, ekinlarning rivojlanish darajasi, sug‘orish samaradorligi hamda yer degradatsiyasi kabi jarayonlar doimiy nazorat ostida bo‘ladi. Bu esa hokimliklar va tegishli idoralarga muammolarni erta aniqlash va aniq choralar ko‘rish imkonini yaratadi. Sababi, Andijon va Namangan hududlari uchun qishloq xo‘jaligi asosiy iqtisodiy yo‘nalishlardan biri hisoblanadi. Kosmik texnologiyalarni joriy etish orqali esa ekin maydonlarining real holatini bilish, hosildorlikni prognoz qilish va suv tanqisligini tezda aniqlash mumkin bo‘ladi.

Qayd etilganidek, kosmik texnologiyalar Andijon va Namangan shaharlarida hududiy rejalashtirish, yangi qurilishlar va infratuzilma loyihalarini amalga oshirishda ham muhim ahamiyat kasb etadi. Xususan, sun’iy yo‘ldosh ma’lumotlari asosida noqonuniy qurilishlarni aniqlash, yer ajratish jarayonlarini shaffoflashtirish, sel, ko‘chki va boshqa tabiiy xavflarni prognoz qilishga erishiladi.

Uchrashuvlar davomida muhokama qilingan masalalar kosmik texnologiyalarni davlat boshqaruviga integratsiya qilish orqali qarorlar qabul qilish jarayonini raqamlashtirishga xizmat qiladi. Aniq ma’lumotlarga asoslangan boshqaruv esa hududlarni rivojlantirish bo‘yicha strategik rejalarning samaradorligini oshiradi.

Bir so‘z bilan aytganda, “O‘zbekkosmos” agentligi va Andijon hamda Namangan viloyatlari hokimliklari o‘rtasidagi hamkorlik Vodiy hududlarida kosmik texnologiyalarni keng joriy etish uchun mustahkam zamin yaratadi. Bu jarayon nafaqat iqtisodiy samaradorlikni oshiradi, balki tabiiy resurslarni muhofaza qilish, aholi farovonligini yaxshilash va hududlarning barqaror rivojlanishini ta’minlashda muhim omil bo‘lib xizmat qiladi.