O‘rmon va yashil hududlarni ko‘paytirish, cho‘llanishga qarshi kurashish agentligi

Markazning asosiy maqsadi — mahallalarni sifatli ko‘chatlar bilan ta’minlash, yashil hududlarni kengaytirish va ko‘chatchilikni aholi uchun daromad manbaiga aylantirishdir. Bu yerda manzarali va mevali daraxtlar, butalar hamda gullar yetishtirish uchun zamonaviy infratuzilma yaratilgan.

Xorij tajribasi asosida barpo etilgan majmuaning 50 gektarida manzarali daraxtlar, 5 gektarida mevali daraxtlar, 3 gektarida esa buta va gul ko‘chatlari yetishtiriladi. Birinchi bosqichda 1,6 million dona, keyingi bosqichda esa 5 million dona nihol va ko‘chat yetishtirish rejalashtirilgan. Markazda 41 turdagi manzarali va ignabargli daraxt ko‘chatlari mavjud. Ochiq ko‘paytirish maydonlari, issiqxonalar, urug‘dan nihol yetishtirish va ko‘chatlarni soyalash inshootlari yil davomida uzluksiz ishlab chiqarish imkonini beradi. Uchta membranali suv havzasining umumiy sig‘imi 4,2 ming kub metrni tashkil etadi. Shuningdek, 20 gektar maydonda tomchilatib sug‘orish tizimi joriy qilingan.
 

Qolaversa, kompost va mulcha tayyorlash uskunalari hamda quyosh panellaridan foydalanish resurslarni tejashga xizmat qiladi. Hisob-kitoblarga ko‘ra, zamonaviy texnologiyalar yordamida ko‘chat yetishtirish hajmi an’anaviy usullarga nisbatan 8–10 barobar oshishi, suv sarfi esa 3 barobar kamayishi mumkin. Natijada ko‘chatlar tannarxi 30–40 foizga pasayishi kutilmoqda.
 

Markaz faoliyati faqat ko‘chat yetishtirish bilan cheklanmaydi. Mahallalarga ko‘chat va butalar yetkazib berish, zararlangan daraxtlarni davolash, mulchalash hamda tomchilatib sug‘orish tizimlarini tashkil etish bo‘yicha xizmatlar ham yo‘lga qo‘yiladi.
 

Har bir mahallaga o‘rmonchi murabbiy biriktiriladi. “Mahalla yettiligi” a’zolari uchun esa har bir ekish mavsumi oldidan o‘quvlar tashkil etiladi. Bu ko‘chatlarni shunchaki ekish emas, balki ularni to‘g‘ri parvarishlash va yashil hududlarning uzoq muddat saqlanishini ta’minlashga yordam beradi.
 

Loyihaning yana bir muhim jihati — aholini ko‘chatchilikka jalb etish. Kooperatsiya shartnomalari asosida fuqarolarga nihollar yetkazib beriladi. Ular nihollarni o‘z xonadonlarida bir-ikki mavsum parvarishlab, tayyor ko‘chatga aylantiradi. Yetishtirilgan ko‘chatlar kafolatli tarzda sotib olinadi. Bunday yondashuv oilalar uchun qo‘shimcha daromad manbaini yaratish bilan birga, ko‘chat yetishtirishni mahalliy iqtisodiyotning muhim yo‘nalishiga aylantirish imkonini beradi.
 

Davlatimiz rahbari markaz faoliyati bilan tanishar ekan, ko‘chat ekish va bog‘ yaratish xalqimizga xos ezgu an’ana ekanini ta’kidladi. Yangi majmua ana shu an’anani zamonaviy texnologiyalar, tejamkor sug‘orish usullari va aholi manfaatlari bilan uyg‘unlashtiradi.