O‘rmon va yashil hududlarni ko‘paytirish, cho‘llanishga qarshi kurashish agentligi

Davlatimiz rahbari bu tadbirlarda nutq so‘zlab, bir qator muhim tashabbuslarni ilgari surdi. Xususan, Prezident ekologik masalalarga alohida e’tibor qaratdi. Jumladan, Shavkat Mirziyoyev iqlim o‘zgarishi bilan bog‘liq xavf-xatarlar mamlakatlarning oziq-ovqat, suv va energetik xavfsizligiga tobora ko‘proq ta’sir ko‘rsatayotganligini, bu esa ShHT doirasida ushbu masalalar bo‘yicha yagona kun tartibini shakllantirish zaruratini taqozo etayotganligini ta’kidladi.

Shuningdek, Davlatimiz rahbari BMTning Barqaror rivojlanish maqsadlariga erishishda mintaqaviy tashkilotlar salohiyatidan yanada faol foydalanish lozimligini qayd etib, tabiatdan foydalanish, “yashil” energetika, raqamli xizmatlar va sog‘liqni saqlash sohalarida mintaqalararo loyihalar va texnologiyalarning Ochiq bankini shakllantirishni taklif qildi.

Bundan tashqari, Shavkat Mirziyoyev Yaqin Sharqda muloqotni qayta tiklash va keskinlikni yumshatish, o‘zaro bog‘liq va barqaror makonni shakllantiradigan “ShHT – 2040: umumiy taraqqiyot makoni” konseptual qarashini ishlab chiqish, maxsus iqtisodiy zonalar, ishlab chiqarish jarayonlari, sotuv bozorlari va logistikani birlashtiradigan ShHT Sanoat kooperatsiyasi xaritasini ishlab chiqish, sun’iy intellekt sohasida hamkorlik bo‘yicha Butunjahon tashkilotini tashkil etish, kelgusi yili Toshkent shahrida ShHTning sun’iy intellekt va yangi raqamli yechimlar bo‘yicha forumini o‘tkazish,  ShHTga a’zo davlatlarning temir yo‘l makonlari integratsiyasi bo‘yicha kengash ta’sis etish, Xavfsizlik va iqtisodiy hamkorlikning keng ko‘lamli masalalarini muhokama qilish uchun ShHTning Afg‘oniston bilan muntazam muloqotini qayta tiklash kabi takliflar bildirildi.

Qolaversa, O‘zbekiston Yevroosiyo makonida ochiq va o‘zaro manfaatli hamkorlikni rivojlantirish tarafdori ekanligi qayd etilib, “ShHT plyus” madaniyatlar va sivilizatsiyalar doimiy forumini ta’sis etish va ushbu tadbirni BMTning manfaatdor tuzilmalari bilan birgalikda Xiva shahrida o‘tkazish tashabbusi ilgari surildi.

Ta’kidlash joizki, O‘zbekiston bundan buyon ham umumiy farovonlikni mustahkamlash va ko‘p tomonlama sheriklikni rivojlantirishga salmoqli amaliy hissa qo‘shishga tayyor.