O‘rmon va yashil hududlarni ko‘paytirish, cho‘llanishga qarshi kurashish agentligi

Tadbirda Ekologiya qo‘mitasi huzuridagi O‘rmon agentligi direktor o‘rinbosari G‘olibjon Qurbonov ushbu pavlovniya plantatsiyasining barpo etilishi jarayonlari, yashillikni kengaytirish maqsadida amalga oshirilgan xayrli tashabbuslarning ahamiyati xususida ishtirokchilarga batafsil ma’lumot berdi.

"2021-yilgacha bugun ko‘rib guvohi bo‘layotganimiz pavlovniyazorlar hududi o‘rni dasht va yalangliklaridan iborat edi. Andijon davlat o‘rmon xo‘jaligi tomonidan amalga oshirilgan mehnatlar evaziga hududda madaniy o‘rmonlar barpo etildi, - dedi G‘.Qurbonov. - Bu xayrli tashabbuslar yerlar degradatsiyasining oldini olishga, anomal issiq ta’sirini kamaytirishga va ekotizimlarni mustahkamlash orqali iqlim o‘zgarishlarining salbiy oqibatlarini yumshatishga xizmat qiladi. Albatta, bugun barcha xo‘jalik rahbarlari ushbu xayrli tashabbusni o‘z hududida samarali joriy etsa, bu har jihatdan foydali bo‘ladi."

Ma’lumot o‘rnida, ushbu pavlovniyazor Asaka tumanining Marhamat tumani bilan tutashgan adirliklaridagi 100 gektardan ziyod yer maydonida 2021-yilda barpo etilgan. Asosiysi, hududda daraxtlarni sug‘orish imkoniyati ham yaratilgan.

E’tiborlisi, o‘z vaqtida qilingan mehnatlar natijasida ushbu pavlovniya plantatsiyalari bugun viloyatning chinakam yashil hududiga aylanmoqda.