Pop Ixtisoslashtirilgan davlat o‘rmon xo‘jaligida maxsus-taktik mashg‘ulotlar o‘tkazildi
2026-07-20 16:50:00 / Yangiliklar
Namangan viloyati Favqulodda vaziyatlar boshqarmasi tomonidan Pop IDO‘X bilan hamkorlikda tashkil etilgan tadbirda Favqulodda vaziyatlar boshqarmasidan 7 ta maxsus texnika va 42 nafar shaxsiy tarkib, FVDQT xizmatlaridan 7 ta texnika va 22 nafar xodim, o‘rmon xo‘jaligi ishchi-xodimlari, hududga yaqin aholi orasidan tuzilgan 50 nafardan ortiq mahalliy ko‘ngillilar ishtirok etdi.
Tadbir davomida shartli ravishda yuzaga keladigan yong‘inlarni bartaraf etish, o‘rmon xo‘jaligi xodimlarining birlamchi yong‘in o‘chirish vositalaridan foydalanish ko‘nikmalari, Favqulodda vaziyatlar bo‘linmalarining tezkor harakatlari, yong‘in tarqalishini cheklash hamda kuch va vositalarni samarali boshqarish bo‘yicha amaliy harakatlar bajarildi.
Shuningdek, qutqaruv xizmatlari va hamkor tashkilotlarning favqulodda vaziyatlarga tayyorgarligi yana bir bor sinovdan o‘tkazilib, o‘rmon hududlarida sodir bo‘lishi mumkin bo‘lgan yong‘inlarni bartaraf etish, qutqaruv ishlarini olib borish, ishchi-xizmatchilarning favqulodda vaziyatlarda to‘g‘ri harakat qilishi hamda yong‘in va texnika xavfsizligi qoidalariga rioya etish bo‘yicha amaliy tajribalar mustahkamlandi.