O‘zbekiston Respublikasi Suv хo‘jaligi vazirligi

Unda Suv xo‘jaligi vaziri Sh. Xamrayev boshchiligida O‘zbekiston delegatsiyasi ishtirok etdi.

Tadbirni Qozog‘iston Respublikasi Bosh vaziri o‘rinbosari K.Bozumbayev rasman ochib berdi.

Yig‘ilishda Qozog‘iston Suv resurslari va irrigatsiya vaziri N.Nurjigitov, Tojikiston Respublikasi Energetika va suv resurslari vazirining birinchi o‘rinbosari D.Shodi hamda Turkmaniston Suv xo‘jaligi davlat qo‘mitasi raisi D.Gendjiyev (onlayn) o‘z nutqlari bilan ishtirok etib, muhim masalalar yuzasidan fikr bildirdilar.

O‘zbekiston Respublikasi Suv xo‘jaligi vaziri Sh.Xamrayev Davlatimiz rahbari Sh. Mirziyoyevning suv xo‘jaligi sohasiga alohida e’tibor qaratayotganini ta’kidlar ekan, joriy yil avgust oyida Suv kodeksi hamda Suv resurslarini boshqarish va irrigatsiya sektorini rivojlantirishning 2025–2028-yillarga mo‘ljallangan dasturi tasdiqlanganligini aytib o‘tdi.

Yig‘ilishda mintaqamizda suv tejovchi innovatsion texnologiyalarni keng ko‘lamda joriy etish masalasi bugungi kunda tobora dolzarb ahamiyat kasb etayotgani qayd etildi.

Shuningdek, 2025-yilgi vegetatsiya mavsumida kuzatilayotgan suv tanqisligini yumshatish maqsadida O‘zbekiston tomonidan amalga oshirilayotgan keng ko‘lamli chora-tadbirlar yuzasidan ma’lumot berildi.

2025-yil vegetatsiya mavsumi og‘ir kechganligiga qaramasdan O‘zbekiston tomoni Qozog‘iston oldidagi majburiyatlarini to‘liq bajarganligi ta’kidlandi.

Shu bilan birga, irrigatsiya tizimlarini modernizatsiya qilish masalalariga bag‘ishlangan seminar tashkil etish, transchegaraviy suv resurslarini samarali boshqarish yo‘nalishida tajriba almashish hamda suv tejovchi texnologiyalarni keng joriy etish bo‘yicha qo‘shma tashabbuslarni amalga oshirish zarurligi bildirildi.

Yig‘ilishda komissiya ijro etuvchi organlari hisoblangan “Amudaryo” va “Sirdaryo” havzalari suv xo‘jaligi birlashmalari, Ilmiy-axborot markazi va kotibiyati rahbarlari, shuningdek  Orolni qutqarish xalqaro jamg‘armasi ijroiya qo‘mitasi raisi, Qirg‘iz Respublikasining Qozog‘istondagi elchisi, Jahon Banki, Osiyo Taraqqiyot Banki, Shveysariya xalqaro hamkorlik tashkiloti, Germaniya xalqaro hamkorlik agentligi, BMT Yevropa iqtisodiy komissiyasi kabi tashkilotlarning mas’ul vakillari ishtirok etdi.

Mintaqada mavjud suv resurslaridan samarali
va oqilona foydalanish, Orolni qutqarish xalqaro jamg‘armasi ta’sischi Davlat rahbarlarining sammitlaridan kelib chiqadigan vazifalar muhokama qilindi.

Orolni qutqarish xalqaro jamg‘armasi tashkiliy tuzilmasi va shartnomaviy-huquqiy bazasini takomillashtirish bo‘yicha ishchi guruh faoliyati to‘g‘risidagi axborot ma’lumot uchun qabul qilindi.

 “Amudaryo” va “Sirdaryo” havzalari suv xo‘jaligi birlashmalari rahbarlarining Amudaryo va Sirdaryo havzalarida 2025-yil vegetatsiya davri uchun suv omborlari limitlari va ishlash rejimlaridan foydalanish natijalari to‘g‘risidagi hisobotlari eshitildi.

Shu bilan birga, Qozog‘iston va O‘zbekiston tomonlari o‘rtasida 2026-yil vegetatsiya davri boshlangunga qadar davlat chegarasidagi Chordara suv omboriga suv kirishini birgalikda aniqlash maqsadida qo‘shma gidropost o‘rnatishga, shuningdek, gidromet xizmatlari o‘rtasida harakatlarni muvofiqlashtirishni yaxshilash bo‘yicha qo‘shma choralar ko‘rishga kelishib olindi.

Yig‘ilish doirasida xalqaro moliya institutlari, jumladan, Osiyo taraqqiyot banki va Jahon banki, shuningdek, boshqa xorijiy donor tashkilotlari vakillari bilan ikki tomonlama uchrashuvlar o‘tkazildi.

Uchrashuvlar chog‘ida xorijiy ekspertlar bilan transchegaraviy suv resurslarini boshqarish, gidrotexnika inshootlarini avtomatlashtirish va raqamlashtirish, shuningdek, mazkur yo‘nalishlarda amalga oshiriladigan loyihalarni moliyalashtirish masalalari atroflicha muhokama etildi.

Qozog‘iston Respublikasi Suv resurslari va irrigatsiya vazirligi vakillari hamda Tojikiston Respublikasi Energetika va suv resurslari vazirligi rahbariyati bilan
2025-yil 30-may kuni imzolangan “Bahri Tochik” suv omborining 2025-yil iyun-avgust oylarida ish rejimini belgilash bo‘yicha imzolangan Bayonning ijro holati qo‘shimcha ravishda muhokama etildi. Uchrashuv yakunlari bilan barcha tomonlar Bayonda keltirilgan masalalarni o‘z muddatlarida amalga oshirilishi tarafdori ekanliklarini ta’kidlab o‘tdi.

Shuningdek, Turkmaniston suv xo‘jaligi davlat qo‘mitasi raisi o‘rinbosari D.Ishankuliev bilan Suv xo‘jaligi masalalari bo‘yicha  o‘zbek-turkman Hukumatlararo qo‘shma komissiyasining navbatdagi yig‘ilishida ko‘rib chiqiladigan masalalar yuzasidan muzokara olib borildi.

Davlatlararo suv xo‘jaligini muvofiqlashtirish komissiyasining navbatdagi 91-yig‘ilishini Turkmanistonda o‘tkazishga kelishildi.

Otabek Hazratov,

Suv xo‘jaligi vazirligining Xalqaro aloqalar va Jahon savdo tashkiloti masalalari bo‘limi boshlig‘i