O‘zbekiston Respublikasi Suv хo‘jaligi vazirligi

Seminarning ochilishida Suv xo‘jaligi vaziri o‘rinbosari O‘.Sheraliуev, Boshqaruv samaradorligi agentligi mas’ul xodimi X.Shakirov va boshqalar so‘zga chiqib, mamlakatimizda so‘nggi yillarda davlat fuqarolik xizmatini zamonaviy standartlar asosida tashkil etish, davlat xizmatchilari ishini natijadorlikka yo‘naltirish, aholining davlat xizmatiga bo‘lgan ishonchini yanada oshirish, sohaga istiqbolli kadrlarni jalb qilish va ularni professional mutaxassis etib tayyorlashning samarali tizimini joriy qilish borasida keng ko‘lamli ishlar amalga oshriirilayotganligini ta’kidladi.

Xususan, O‘zbekiston Respublikasi Prezidentining joriy yil 19-iyundagi “Davlat fuqarolik xizmatini yangi yondashuvlar asosida tashkil etish hamda professional va natijadorlikka yo‘naltirilgan davlat xizmatchilari korpusini shakllantirish chora-tadbirlari to‘g‘risida”gi Farmoni bu boradagi islohotlarni yangi bosqichga olib chiqdi. Mazkur hujjatda Davlat fuqarolik xizmatini 2030-yilgacha rivojlantirish strategiyasi va maqsadli ko‘rsatkichlari, Strategiyani amalga oshirish bo‘yicha 2025–2026 yillarga mo‘ljallangan chora-tadbirlar dasturi kabi qator muhim yo‘nalishlar belgilab berilganligi bilan ahamiyatlidir.

Farmonga asosan joriy yil 1-avgustdan boshlab davlat xizmati lavozimlarini egallash bo‘yicha tanlovlarni tashkil etish va o‘tkazish tizimiga qator o‘zgartirish va qo‘shimchalar kiritildi. Xususan, Davlat fuqarolik xizmatiga qabul qilishning yagona tartibi tasdiqlandi. “Davlat fuqarolik xizmati lavozimini egallash uchun tanlov o‘tkazish tartibi to‘g‘risidagi nizom”ga asosan davlat organida 5–7, tuman (shahar) davlat organida 3–5 nafar a’zodan iborat tarkibda Tanlov komissiyasi tuziladi. Lavozimga tayinlashda nomzodni tegishli vazirlik yoki idora bilan kelishish belgilangan bo‘lsa, Tanlov komissiyasi tarkibiga mazkur vazirlik yoki idoraning mas’ul vakili ham kiritiladi.

Ichki tanlovlar vakant lavozim vujudga kelgan kundan boshlab 10 ish kuni ichida e’lon qilinadi. Bunda ichki tanlovlar faqatgina bir davlat organi doirasida yoki davlat fuqarolik xizmati tizimidagi barcha davlat organlari davlat fuqarolik xizmatchilari uchun e’lon qilinishi mumkin. Ichki tanlovlar natijasida tanlov g‘olibi aniqlanmagan yoki vakant lavozim vujudga kelgan kundan boshlab 15 ish kuni ichida ichki tanlov e’lon qilinmagan taqdirda, ushbu vakant lavozim avtomatik ravishda tashqi tanlov sifatida e’lon qilinadi.

Tanlovlarda ishtirok etish uchun hujjat topshirgan nomzodlar soni 5 nafar va undan kam bo‘lgan hollarda tanlovning test bosqichi o‘tkazilmasligi mumkin. Tanlovlarning suhbat bosqichiga o‘tgan nomzodlar soni 20 nafardan ortiq bo‘lgan hollarda Davlat xizmatini rivojlantirish agentligi bilan kelishilgan holda qo‘shimcha bosqich (esse yozish, test va h.k.) qo‘shilishi mumkin.

Nomzod bir oy davomida beshtagacha vakant lavozimlar bo‘yicha tanlovlarda ishtirok etishi mumkin, xolos.

Nomzodlarning test sinovi bo‘yicha ijobiy natijalari olti oy davomida saqlanib, keyingi vakant lavozimlar bo‘yicha o‘tkaziladigan tanlovlarda inobatga olinadi.

Test savollari Agentlik buyurtmasiga asosan Oliy ta’lim, fan va innovatsiyalar vazirligi huzuridagi Bilim va malakalarni baholash agentligi tomonidan “boshqaruv kadrlari” hamda “mutaxassislar” lavozim toifalari bo‘yicha ishlab chiqiladi. Shu bilan birga test sinovlariga “stressga bardoshlilik” va intellektuallik koeffitsienti (IQ) darajasini aniqlashga qaratilgan alohida bo‘lim kiritilishi mumkin.

Test sinovi jarayonida taqiqlangan talablarni buzgan nomzod ishchi organ tomonidan dalolatnoma tuzgan holda tanlovdan chetlashtiriladi.

Test sinovidan chetlashtirilgan nomzod uch oy davomida keyingi tanlovlarga qo‘yilmaydi.

Yakuniy ball 100 ballik tizimda baholanib, suhbat natijasi yakuniy ballning 80 foizini, test natijasi 20 foizini tashkil qiladi.

Seminar ishtirokchilari o‘zlarini qiziqtirgan savollarga mutasaddilardan yetarlicha javob oldi.

Inson resurslarini rivojlantirish
va boshqarish boshqarmasi