O‘zbekiston Respublikasi Suv хo‘jaligi vazirligi

Vazir dastlab o‘tgan 2024-yilda sohada erishilgan natijalarni sarhisob qildi. 

Bu yil suv qanday bo‘lishi haqida to‘xtalib o‘tdi. 2025-yilning 18-mart holatiga respublikamizdagi suv omborlariga jami 13 mlrd kub metr suv yig‘ildi. Taqqoslaydigan bo‘lsak, bu o‘tgan yilning shu davriga nisbatan 20 foizga ko‘p.

Gidrometeorologiya xizmati agentligining tahlili va dastlabki baholashga ko‘ra, Amudaryo va Sirdaryo havzalarining ko‘pchilik daryolarida 2025-yil sug‘orish mavsumida kutilayotgan suv miqdori me’yorga nisbatan kam bo‘lishi, xususan Qashqadaryo daryosida 65-75 foiz, Surxondaryo, Qoradaryo, Chirchiq va Ohangaronda 70-80 foiz, Zarafshon va Farg‘ona vodiysi shimolidagi daryolarda 75-85 foiz, Vaxsh va Norin daryosida 90-100 foiz, Farg‘ona vodiysi janubidagi daryolarda me’yordan 95-105 foiz bo‘lishi kutilmoqda.

Kanallarni betonlash, suv tejovchi texnologiyalarni joriy etish, sohani raqamlashtirish, suvni samarali boshqarish hisobiga 2025-yilda 10 mlrd kub metr suvni iqtisod qilish ko‘zda tutilgan.

Mamlakatimiz Prezidentining “O‘zbekiston – 2030” strategiyasini “Atrof-muhitni asrash va “yashil iqtisodiyot” yilida amalga oshirishga oid davlat dasturi to‘g‘risida” 2025-yil 30-yanvardagi PF-16-sonli Farmonida suv xo‘jaligi sohasiga doir muhim vazifalar belgilangan. Tadbirda davlat dasturining vazirlikka tegishli bandlari ijrosini ta’minlash choralari ko‘rilayotgani aytib o‘tildi.

Kanallarni betonlash, sohada davlat-xususiy sheriklik loyihalarini ko‘paytirish haqida ma’lumot berildi. Ochiqlik va shaffoflikni ta’minlash, korrupsiyaga qarshi kurashishda sohada faoliyat olib borayotgan nodavlat notijorat tashkilotlari hamda vazirlik huzuridagi jamoatchilik kengashining o‘rni muhim ekanligiga e’tibor qaratildi.  

Tadbirda O‘zbekiston Respublikasi Oliy Majlisi Qonunchilik palatasidagi O‘zbekiston ekologik partiyasi fraksiyasining rahbari Abdushukur Hamzayev so‘z olib, kuni kecha Oliy Majlis Senati tomonidan ma’qullangan “O‘zbekiston Respublikasining Suv kodeksini tasdiqlash to‘g‘risida”gi Qonun loyihasining ahamiyati,  Ekopartiya va vazirlik o‘rtasidagi hamkorlikni mustahkamlash, jamoatchilik nazoratini kuchaytirish haqida fikr bildirdi.

Shuningdek, nodavlat notijorat tashkilotlari hamda vazirlik huzuridagi jamoatchilik kengashi a’zolarining taklif va tashabbuslari tinglandi.

Ushbu tadbir Butunjahon suv kuni arafasida, vazirlik huzuridagi jamoatchilik kengashi tashabbusi bilan tashkil etildi.

Shuningdek, bugun Suv xo‘jaligi vaziri Sh.Xamrayev ommaviy axborot vositalari vakillari uchun matbuot anjumani o‘tkazdi.

Matbuot anjumanida “O‘zbekiston” radiokanali, O‘zA, “O‘zbekiston qishloq va suv xo‘jaligi” jurnali, “Gazeta.uz” sayti, “Qishloq hayoti” gazetasi muxbirlarining savollariga batafsil javob qaytarildi.

Axborot xizmati