JOMBOYLIK SUV ISTE’MOLCHILARI BILAN ONLAYN MULOQOT
2024-09-18 19:00:00 / Yangiliklar
Unda viloyat suv xo‘jaligi tashkilotlari rahbarlari, tuman “Suv yetkazib berish xizmati” davlat muassasasi xodimlari, tumandagi klaster tashkiloti, fermer xo‘jaliklari vakillari hamda tomorqachilar ishtirok etdi.
“O‘ng qirg‘oq yerlari” fermer xo‘jaligi rahbari Sobir Ergashev hududdagi “Oq” zovurini tozalashda yordam so‘radi. Zarafshon ITHB va Meliorativ ekspesiya rahbarlariga dasturga kiritilgan ushbu kollektorni joriy yil 1 oktyabrgacha tozalab, vazirlikka hisobot taqdim etish topshirildi.
“Mustang dalasi” fermer xo‘jaligi rahbari Jamol Xolboev tomchilatib sug‘orish texnologiyasini joriy qilish bo‘yicha “Suvkredit.uz” platformasi orqali “DUAL SULAMA GROUP” MChJga 33 gektar maydon uchun shartnoma asosida boshlang‘ich 50 foiz mablag‘, ya’ni 435,0 mln so‘m o‘tkazib berilganligini, ammo shu kunga qadar sug‘orish texnologiyasi o‘rnatilmaganligi aytib, mablag‘ni qaytirishda amaliy yordam so‘radi.
Shunga muvofiq, vazirlik tomonidan “DUAL SULAMA GROUP” MChJ ga ogohlantirish xati yuborilishi hamda mazkur korxonaga qonuniy chora ko‘rilishini so‘rab Bosh prokuraturaga murojaat etilishi ma’lum qilindi.
Muloqot chog‘ida ichki ariqlarni tozalash, buning uchun texnika ajratish haqida murojaatlar bo‘ldi. Ularni ijobiy hal etish bo‘yicha mas’ullarga topshiriqlar berildi.
Tumanda olinayotgan va fermerlarga yetkazib berilayotgan suvning aniq hisob-kitobini yuritish va iste’molchilarning muammolarini hal etishda sustkashlikka yo‘l qo‘yganligi uchun Jomboy tumani “Suv yetkazib berish xizmati” davlat muassasasi rahbarining lavozimida qolish masalasi ko‘rib chiqiladigan bo‘ldi.
Ushbu masalani va 2 ta murojaatda ko‘tarilgan muammoni chuqurroq o‘rganish uchun Jomboy tumaniga vazirlik ishchi guruhi yuborildi.
Axborot xizmati