O‘zbekiston-Qirg‘iziston: suv xo‘jaligi sohasida hamkorlik yanada mustahkamlanmoqda
2026-07-16 14:50:00 / Yangiliklar
Uchrashuvda O‘zbekiston delegatsiyasiga Suv xo‘jaligi vazirining birinchi o‘rinbosari – Suv xo‘jaligi obyektlaridan foydalanish agentligi direktori Z.Ishpulatov, Qirg‘iziston delegatsiyasiga esa Suv resurslari xizmati direktori A.Jeenaliyev rahbarlik qildi.
Muzokaralar davomida ikki mamlakat o‘rtasida suv xo‘jaligi sohasidagi hamkorlikning bugungi holati va istiqbollari, Kosonsoy (O‘rta-To‘qay) suv omborini samarali ekspluatatsiya qilish, chegaradosh hududlardagi irrigatsiya infratuzilmasini modernizatsiya qilish, suv tejovchi texnologiyalarni keng joriy etish, sohani raqamlashtirish, qo‘shma loyihalarni amalga oshirish hamda «Do‘stlik» nasos stansiyasi faoliyati bilan bog‘liq masalalar muhokama qilindi.
O‘zbekiston tomoni mamlakatda amalga oshirilayotgan «Raqamli suv xo‘jaligi» ekotizimi, suv tejovchi texnologiyalarni joriy etish, suv resurslarini hisobga olish va zamonaviy axborot tizimlarini qo‘llash bo‘yicha erishilgan natijalarni taqdim etdi.
Qirg‘iz tomoni mazkur yo‘nalishlarda O‘zbekiston tajribasini o‘rganishga qiziqish bildirdi.
Tomonlar Andijon viloyatida Qirg‘iz Respublikasining O‘sh va Jalolobod viloyatlari suv xo‘jaligi mutaxassislari uchun suv tejovchi texnologiyalar hamda gidrometriya sohasida amaliy o‘quv seminarlarini tashkil etish masalasini ham muhokama qildilar.
Shuningdek, “Paxtaobod” kanalini betonlash ishlarini boshlash uchun zarur tashkiliy choralarni tezkor amalga oshirish, chegaradosh hududlardagi suv xo‘jaligi infratuzilmasini modernizatsiya qilish hamda «Do‘stlik» nasos stansiyasidagi ta’mirlash ishlarini jadallashtirish bo‘yicha kelishuvlarga erishildi.
Uchrashuv davomida Qirg‘iz tomoni 2026-yil 29-sentabr – 1-oktabr kunlari Samarqand shahrida bo‘lib o‘tadigan Xalqaro suv tejash forumida ishtirok etishga tayyorligini bildirdi.
Muzokaralar yakunida tomonlar transchegaraviy suv resurslaridan oqilona foydalanish, zamonaviy texnologiyalarni joriy etish va suv xo‘jaligi sohasidagi o‘zaro manfaatli hamkorlikni yanada rivojlantirishga qaratilgan amaliy ishlar davom ettirilishini tasdiqladilar.
Axborot xizmati