O‘zbekiston Respublikasi Suv хo‘jaligi vazirligi

Unda ta’kidlandiki, joriy yilda respublikamiz bo‘yicha jami 300 ming gektar maydonda suv tejovchi texnologiyalarni joriy qilish hamda 200 ming gektar yerlarni lazer uskunasi yordamida tekislash belgilangan.

20-avgust holatiga 304 ming gektar maydonda suv tejovchi texnologiyalar joriy qilindi. Shundan 71 ming gektarda tomchilatib, 33 ming gektarda yomg‘irlatib, 28 ming gektarda diskret sug‘orish texnologiyalari joriy etildi, 172 ming gektar maydonlarni egiluvchan quvurlar orqali va egatga plyonka to‘shab sug‘orish yo‘lga qo‘yildi. 282 ming gektar yerlar lazer yordamida tekislandi.

Mamlakatimizda 2019-yildan boshlab suv tejovchi texnologiyalarni joriy etganlarni davlat tomonidan qo‘llab-quvvatlash mexanizmi yo‘lga qo‘yilgani, jumladan, subsidiyalar ajratilayotgani katta samara berib, klaster tashkilotlari va fermerlarni rag‘batlantirmoqda.

Respublikamizda 4,3 mln gektar sug‘oriladigan ekin maydonlari bo‘lib, bugungi kunda 35 foizdan ortig‘i suv tejovchi texnologiyalar bilan qamrab olindi.

Aynan suvni tejaydigan texnologiyalar joriy etilgan maydonlarda yil boshidan buyon 1,4 mlrd kub metr suv iqtisod qilindi. Taqqoslaydigan bo‘lsak, bu Navoiy viloyatida qishloq xo‘jaligi ekinlarini sug‘orish uchun bir yilda talab qilinadigan suv miqdoridan bir yarim baravarga ko‘pdir.

2030-yilgacha sug‘oriladigan maydonlarni tejamkor texnologiyalar bilan to‘liq qamrab olish vazifasi qo‘yilgan.  Buning uchun imkoniyatlar yetarli. Suvni tejaydigan texnologiyalar va ularning butlovchi qismlarini mahalliy sharoitda ishlab chiqaruvchi korxonalar soni 60 tadan oshdi.

Mintaqamizda suv resurslari yildan yilga kamayishi kuzatilayapti. Mana shunday sharoitda suv tanqisligini yumshatishning eng maqbul yechimi suvni tejash, undan oqilona foydalanish ekanligini hayotning o‘zi isbotlab turibdi.

Suvning har qatrasini tejashda zamonaviy texnologiyalardan unumli foydalanish yurtimizni to‘kin-sochin, hayotimizni farovon qilib boraveradi.

Axborot xizmati