QAROR SHARHI
2026-07-10 12:00:00 / Yangiliklar
Hujjat bilan, qonunchilik talablari asosida nomlari davlat tili qoida va meyorlariga muvofiqlashtirilayotgan hamda yangi nom berilgan 216 ta daryolar, soylar, ko‘llar, buloqlar va sharsharalar ro‘yxati tasdiqlangan. Masalan, “Akkol” nomi “Oqko‘l”, “Ribatskiy zaliv” — “Baliqchiko‘l”, “Tubakol” — “Tubako‘l” ko‘rinishida rasmiylashtirilgan.
Qarorda Suv xo‘jaligi vazirligiga ikki oy muddatda Kadastr agentligi, Turizm qo‘mitasi, “O‘zbekbaliqsanoat” uyushmasi bilan birgalikda daryolar, soylar, buloqlar, sharsharalar nomlarining davlat tili qoida va meyorlariga muvofiqlashtirilishi hamda ularga yangi nom berilishi munosabati bilan tegishli hujjatlar, xaritalar, ma’lumotlar bazalariga o‘zgartishlar kiritish vazifasi yuklatilgan.
Shuningdek, vazirlik Qoraqalpog‘iston Respublikasi Vazirlar Kengashi va viloyatlar hokimliklari, Turizm qo‘mitasi, “O‘zbekbaliqsanoat” uyushmasi bilan birgalikda daryolar, soylar, ko‘llar, buloqlar va sharsharalarda o‘rnatilgan peshlavhalar hamda axborot ko‘rsatkichlaridagi yozuvlarning davlat tili qoidalari va meyorlariga muvofiq lotin yozuviga asoslangan o‘zbek alifbosida yozilishini ta’minlaydi.
Axborot xizmati