O‘zbekiston Respublikasi Suv хo‘jaligi vazirligi

Xo‘jayli tumanida o‘tkazilgan sayyor qabulda tadbirkor o‘zini qiynayotgan muammosini hal etishda yordam so‘rab O‘zbekiston Respublikasi Suv xo‘jaligi vazirining birinchi o‘rinbosari – Suv xo‘jaligi obyektlarini ekspluatatsiya qilish agentligi direktori Zokir Ishpulatovga murojaat qildi.

Murojaat yuzasidan mas’ullarga masalani zudlik bilan o‘rganib chiqib, qonuniy yechim topish bo‘yicha topshiriq berildi.

Shuningdek, sayyor qabul davomida fermerlar, tadbirkorlar va soha xodimlari tomonidan suv xo‘jaligi sohasiga oid qator masalalar muhokama qilindi. Jumladan, “JANABAY-JAULAN” va “ALLASHUKUR-BEGZAD” fermer xo‘jaliklari rahbarlari klasterlardan qaytarib olingan nasos agregatlarini davlat-xususiy sheriklik asosida olish bo‘yicha yordam so‘radi.

Shuningdek, fermerlar tomonidan suv tejovchi texnologiyalar uchun ajratilayotgan subsidiyalardan foydalanish tartibi, sho‘r yuvish ishlarining soliqqa tortilishi kabi masalalar ham o‘rtaga tashlandi.

Qabul davomida ayrim masalalarga shu yerning o‘zida yechim topilgan bo‘lsa, qo‘shimcha o‘rganish talab etadigan murojaatlar bo‘yicha mas’ullarga topshiriqlar berilib, ularning ijrosi nazoratga olindi.

Darhaqiqat, chekka hududlarda yashovchi aholi va tadbirkorlarning muammolarini joyiga chiqqan holda o‘rganishga qaratilgan bunday qabullar fuqarolarni ovora qilmasdan, masalalarga tezkor yechim topish imkonini bermoqda.

Qoraqalpog‘iston Respublikasi
Suv xo‘jaligi vazirligi Matbuot xizmati