O‘zbekiston Respublikasi Suv xo‘jaligi vazirligi Axborot xizmatining rasmiy bayonoti
2026-06-11 20:10:00 / Yangiliklar
Joriy yilning 11-iyun kuni taxminan soat 14:00 lar atrofida Toshkent shahri Bektemir tumani “Nurafshon” MFY hududidan oqib o‘tuvchi Chirchiq daryosining 41.230338:69.319910 koordinatasida joylashgan “Suv so‘ndirgich” (vodopad) inshootining oqim bo‘ylab o‘ng nishabligidagi beton qoplamasi hamda qirg‘oq bo‘yi mintaqasida o‘pirilish sodir bo‘lgan.
Suv xo‘jaligi vaziri Sh.Xamrayev boshchiligidagi ishchi guruh voqea joyiga yetib borgan. Favqulodda vaziyatlar vazirligi, tegishli tashkilotlar va Toshkent shahar hokimligi mas’ullaridan iborat Tezkor shtab tuzilgan.
Sodir bo‘lgan o‘pirilish holatini bartaraf etish ishlarini olib borish uchun hozirda 2 ta ekskavator, 10 ta samosval, 2 texnika hamda ishchi kuchi jalb etilib Chirchiq daryosi qirg‘og‘ini mustahkamlash ishlari olib borilmoqda.
Hodisa oqibatida atrofdagi bino-inshootlar, obektlar hamda aholi xonadonlariga zarar yetmagan. Ayni vaqtda ular uchun hech qanday xavf mavjud emas.
Ishchi guruhlar tomonidan Bektemir tumani hududidan oqib o‘tuvchi Chirchiq daryosining oqim bo‘ylab ikki yon atrofida joylashgan fuqarolarning yashash xonadonlari va tadbirkorlik sub’ektlarida profilaktik suhbatlar o‘tkazilmoqda, ularga xavotirga o‘rin yo‘qligi tushuntirilmoqda.
Chirchiq daryosida soat 18:00 holatiga suv sathi 278 m3/sek ni tashkil etmoqda.
Ayni paytda daryo suvi kamaytirilmoqda.
Axborot xizmati