O‘zbekiston Respublikasi Suv хo‘jaligi vazirligi

Yig‘ilishning asosiy maqsadi – suv resurslaridan samarali va oqilona foydalanishni ta’minlash, shuningdek, ikki tomonlama hamkorlikni yanada mustahkamlash va vegetatsiya davrida suv taqsimoti bo‘yicha kelishilgan choralarni amalga oshirishdan iborat bo‘ldi.

O‘zbekiston tomonidan Suv xo‘jaligi vaziri Shavkat Xamrayev boshchiligida tegishli vazirlik va idoralar vakillaridan iborat delegatsiya ishtirok etdi.

Qirg‘iziston delegratsiyasiga Qirg‘iz Respublikasi Suv resurslari, qishloq xo‘jaligi va qayta ishlash sanoati vaziri o‘rinbosari – Suv resurslari xizmati direktori Almazbek Jeenaliev boshchilik qildi.

Yig‘ilishda ikki davlat rahbarlari o‘rtasidagi samimiy do‘stlik va ishonch mamlakatlarimiz munosabatlari, yaxshi qo‘shnichilik, o‘zaro hurmat va ishonch tamoyillari asosida izchil rivojlanib borayotgani ta’kidlandi.

Yig‘ilishda mamlakatlarimiz o‘rtasidagi munosabatlar rivojlanib borishi, o‘zaro ishonch va qo‘shnichilikning mustahkamlanishida davlatlarimiz yetakchilari o‘rtasidagi samimiy do‘stlik, birodarlik rishtalari hal qiluvchi ahamiyatga egaligi qayd etildi.

Shu bilan birga, suv xo‘jaligi sohasidagi amaliy hamkorlik strategik sheriklikning muhim yo‘nalishlaridan biri ekani, suv resurslaridan oqilona va samarali foydalanish, mintaqaviy barqarorlikni ta’minlash hamda ikki mamlakat o‘rtasidagi o‘zaro manfaatli hamkorlikni yanada mustahkamlashga xizmat qilishi qayd etildi.

Yig‘ilish davomida tomonlar ilgari erishilgan kelishuvlarning ijro holatini muhokama qilib, suv xo‘jaligi ob’ektlaridan foydalanish, ularni saqlash va tiklash bo‘yicha amalga oshirilayotgan ishlar izchil davom ettirilayotganini qayd etdilar.

Xususan, avvalgi kelishuvlar ijrosini ta’minlash maqsadida O‘zbekiston tomoni Qirg‘iz Respublikasining Jalolobod viloyati hududida joylashgan “Do‘stlik” kanalida 5 km masofada tozalash va ta’mirlash, “PShS” kollektorining 8,7 km qismida mexanizm yordamida tozalash, “Xila”, “Kampirobod”, “Savay” kanallarida ta’mirlash-tiklash va 3,9 km uzunlikdagi kanalni betonlash ishlarini amalga oshirgani amaliy hamkorlikning yuqori samarasi ekanligi ta’kidlandi.

Shuningdek, Kosonsoy (O‘rta-To‘qay) suv omboridan davlatlararo foydalanish masalasidagi o‘zaro hamkorlik ijobiy baholandi.

Yig‘ilishda chegara hududida joylashgan suv xo‘jaligi ob’ektlarida ta’mirlash-tiklash ishlarini amalga oshirish uchun suv xo‘jaligi tashkilotlari xodimlari, avtotransport vositalari va maxsus texnikalarning davlat chegarasi orqali o‘tishi bilan bog‘liq masalalar ko‘rib chiqildi.

Kosonsoy (O‘rta-To‘qay) suv ombori faoliyati, “Do‘stlik” nasos stansiyasidan foydalanish, “Paxtaobod” kanalida betonlash ishlarini amalga oshirish masalalari muhokama qilindi.

Joriy yil uchun Qirg‘iz Respublikasi va O‘zbekiston Respublikasi o‘rtasida suv resurslaridan oqilona foydalanish bo‘yicha reja-grafiklar ko‘rib chiqildi va kelishildi.

Ushbu rejalar vegetatsiya davri mobaynida suv berish, taqsimlash va undan foydalanish rejimlarini belgilab berishi ta’kidlandi.

Tomonlar tasdiqlangan grafiklarga qat’iy rioya qilish, suv taqsimotini doimiy monitoring qilish va vakolatli suv xo‘jaligi tashkilotlari o‘rtasida tezkor muvofiqlashtirishni ta’minlash bo‘yicha kelishuvga erishdilar.

Orol dengizi havzasi davlatlarida 2026–2036-yillarga mo‘ljallangan suv tejovchi texnologiyalarni joriy etish bo‘yicha mintaqaviy dastur loyihasi muhokama qilindi.

O‘zbekiston Respublikasida bugungi kunda 2,6 mln gektar maydonda, ya’ni sug‘oriladigan yerlarning qariyb 60 foizida suv tejovchi texnologiyalar joriy etilgan, 2028 yilga borib ushbu ko‘rsatkichni 3,5 mln gektarga yoki 80 foizga yetkazish rejalashtirilgan. Qirg‘izistonda esa 2024–2025 yillarda 2 369 gektarda suv tejovchi texnologiyalar joriy qilingan va 2026 yilda yana 5 270 gektar maydonda ushbu ishlar amalga oshirilishi belgilangan.

Tomonlar O‘zbekiston Respublikasida suv tejovchi texnologiyalar keng joriy etilayotganini alohida ta’kidlab, bu yo‘nalishdagi ishlar davom ettirilishini muhim deb hisobladilar. Shu bilan birga, Qirg‘iz tomoni ham o‘z hududida suv tejovchi texnologiyalarni bosqichma-bosqich kengaytirish, shu jumladan tomchilatib va yomg‘irlatib sug‘orish texnologiyalari qamrovi oshirilishini ta’kidladi. Shuningdek, Bishkek shahrida energiya samarador va resurs tejovchi texnologiyalarni joriy qilish bo‘yicha mintaqaviy markaz tashkil etish tashabbusini ilgari surdi.

Qirg‘iz Respublikasi delegatsiyasining 2026-yil sentabr oyi oxirida Samarqand shahrida o‘tkazilishi rejalashtirilgan suvni tejash bo‘yicha butunjahon suv forumida ishtirok etishi ham muhokama qilindi.

Tomonlar ushbu tadbirda yuqori darajada ishtirok etishning ahamiyatini ta’kidlab, forum doirasida zamonaviy suv tejash texnologiyalari, suv resurslaridan oqilona foydalanish va mintaqaviy hamkorlikni rivojlantirish bo‘yicha tajriba almashish muhimligini qayd etdilar.

Yig‘ilish yakunida suv xo‘jaligi sohasidagi hamkorlikni yanada mustahkamlash, barcha kelishuvlarning o‘z vaqtida va to‘liq bajarilishini ta’minlash hamda navbatdagi to‘qqizinchi yig‘ilishni Qirg‘iz Respublikasi hududida kelgusi novegetatsiya davrida o‘tkazishga kelishib oldilar.

Mazkur yig‘ilish o‘zaro ishonch, konstruktiv muloqot va strategik sheriklik ruhida o‘tdi hamda uning yakuni bo‘yicha tegishli bayonnoma imzolandi.

Otabek Xazratov,

Xalqaro aloqalar va Jahon savdo tashkiloti masalalari bo‘limi boshlig‘i