O‘zbekiston Respublikasi Suv хo‘jaligi vazirligi

Kanalning salkam 20 km masofadagi qismi Qozog‘iston Respublikasining Turkiston viloyatidan oqib o‘tadi. Xo‘sh, kanalning bu qismida ahvol qanday, qo‘shnilarimiz suvdan qanday foydalanishmoqda? Toshkent viloyati “Bo‘zsuv” irrigatsiya tizimi boshqarmasi Qozog‘iston Respublikasining  Turkiston viloyati suv xo‘jaligi boshqarmasi bilan hamkorlikda irrigatsiya tarmog‘ining ushbu qismidagi “ESTKA” kanali holati bilan tanishib chiqdi. Unda Chirchiq-Ohangaron ITHB boshqarmasi boshlig‘i birinchi o‘rinbosari Sardor Alimbekov, “Bo‘zsuv” ITB boshlig‘i Rustam Foziljonov, boshqarma boshlig‘i o‘rinbosari Javohir Mamadjonov hamda Qozog‘iston  Respublikasining Turkiston viloyati suv xo‘jaligi boshqarmasi boshlig‘i Sadirbek Jakashboev va bir guruh mutaxassislar ishtirok etdi.

Ular tomonidan respublikalararo kanaldan foydalanish, gidrotexnik inshootlarning yaroqligi, tizimning texnik parametri hamda noqonuniy qurilmalar o‘rganib chiqildi.

- Kanal faoliyati  o‘zaro hamkorlikka tayanadi, - deydi Chirchiq-Ohangaron ITHB boshlig‘i birinchi o‘rinbosari Sardor Alimbekov. -Ikki kunlik tashrif davomida kanal suvidan samarali foydalanish, sug‘orish mavsumida suvni to‘g‘ri taqsimlash bo‘yicha muzokaralar olib borildi. Kanalni o‘rganish davomida 30 dan ortiq noqonuniy nasos hamda 10 ga yaqin quloqlar (suv taqsimlash) aniqlandi.

Tashrif davomida viloyat suv xo‘jaligi tashkilot rahbarlari, suv iste’molchilari  ishtirokida yig‘ilish bo‘lib o‘tdi. Unda so‘zga chiqqanlar  “ESTKA” kanali suvidan unumli foydalanish zarurligi, bu ikki xalqni birlashtirib kelgan kanal ekanligini ta’kidlashdi. Gidrotexnik inshootlarni ta’mirlash, noqonuniy qurilmalarga chek qo‘yish bo‘yicha fikr almashildi. Yig‘ilishda “ESTKA” kanalidan foydalanishda o‘zaro hamkorlikni yanada oshirish va suvdan tejab foydalanishga kelishib olindi.Chirchiq-Ohangaron ITHB matbuot xizmati