Oziq-ovqat mahsulotlariga sanitariya-epidemiologik xulosa rasmiylashtirish jarayonini raqamlashtirish bo‘yicha o‘quv seminari tashkil etildi
2025-10-13 12:15:00 / Yangiliklar
Mazkur tadbirda qo‘mita tizimidagi laboratoriyalar, hududiy bo‘limlar vakillari hamda Agentlik mas’ul xodimlari ishtirok etdilar.
Seminar davomida ishtirokchilarga sinov bayonnomalarini elektron shaklda taqdim etish jarayoni, "E-akkreditatsiya" axborot tizimining "E-laboratoriya" moduli orqali ma’lumotlar almashinuvi mexanizmi, shuningdek, oziq-ovqat mahsulotlariga sanitariya-epidemiologik xulosa rasmiylashtirishning yagona elektron tartibi bo‘yicha batafsil ma’lumotlar berildi.
Tadbirda ta’kidlanganidek, endilikda Sanitariya-epidemiologik osoyishtalik va jamoat salomatligi qo‘mitasi laboratoriyalariga sinov bayonnomalarini taqdim etish faqat "E-akkreditatsiya" axborot tizimining "E-laboratoriya" moduli orqali amalga oshiriladi. Bu yangilik jarayonni shaffof, tezkor va izchil tashkil etishga, shuningdek, ma’lumotlarning ishonchliligi va izchilligini ta’minlashga xizmat qiladi.
Seminar ishtirokchilari amaliy mashg‘ulotlar jarayonida tizim orqali sinov bayonnomalarini yuklash, ularni tekshirish va tegishli xulosalarni tayyorlash jarayonlarini amaliy misollar asosida bajarib ko‘rdilar.
Tadbir yakunida, tizimdan samarali foydalanish, foydalanuvchi huquq va majburiyatlari, ma’lumotlarni himoya qilish hamda xulosalarni rasmiylashtirishda qo‘llaniladigan standart yondashuvlar yuzasidan tavsiyalar berildi.
Mazkur o‘quv seminari orqali laboratoriyalar xodimlari elektron ma’lumot almashinuvi tizimi imkoniyatlaridan samarali foydalanish bo‘yicha zarur ko‘nikmalarga ega bo‘ldilar. Shu bilan birga, "E-akkreditatsiya" axborot tizimining "E-laboratoriya" modulining joriy etilishi sog‘liqni saqlash sohasida ma’muriy jarayonlarni raqamlashtirish, inson omilini kamaytirish va xizmatlar sifatini yanada oshirish yo‘lida muhim qadam bo‘ldi.