Saudiya Arabistonining Oʻzbekistondagi elchisi bilan uchrashuv bo‘lib o‘tdi
2025-01-30 10:30:00 / Yangiliklar
Oʻzbekiston Respublikasi Tashqi ishlar vazirligi hamkorligida tashkil etilgan uchrashuvda texnik tartibga solish, standartlashtirish, metrologiya va muvofiqlikni baholash sohasida hamkorlik munosabatlarning hozirgi holati va istiqbollari, hamkorlik koʻlamlarini kengaytirish, malakali kadrlar tayyorlash, grantlar va texnik koʻmakni jalb etish masalalari muhokama qilindi.
Ikki mamlakat oʻrtasida energetika, bojxona, fuqaro aviatsiyasi, turizm, qishloq xoʻjaligi, sogʻliqni saqlash, mehnat munosabatlari kabi sohalar keng rivojlanib borayotganligi va albatta mazkur sohalarni sifat jihatidan yangi darajaga koʻtarishda standartlashtirish va texnik tartibga solish sohasi muhim oʻrin tutishi qayd etildi.
Ishbilarmonlarning aloqalari uchun yanada qulay sharoitlar yaratish, oʻzaro savdo hajmini oshirish, tarkibini diversifikatsiya qilish, savdodagi texnik toʻsiqlarni bartaraf etish zarurligi ta’kidlandi.
Muloqot davomida sohada zarur boʻlgan loyihalar yuzasidan taqdimot qilindi va Saudiya Arabistonining "ACWA Power" kompaniyasi bilan birga barpo qilinayotgan kalibrlash laboratoriyasini qisqa muddatlarda ishga tushirish masalasi koʻrib chiqildi.
Saudiya standartlar, metrologiya va sifat tashkiloti (SASO) bilan hamkorlikni yangi bosqichga olib chiqish, tomonlarning ulkan salohiyatidan toʻliq foydalanish, yangi istiqbolli loyihalarni kengaytirish va yanada chuqurlashtirishga alohida eʼtibor qaratildi.
Shuningdek, malakali kadrlar tayyorlashda qoʻshma loyihalarni yoʻlga qoʻyish yuzasidan qator takliflar ilgari surildi. Uchrashuv yakunlari boʻyicha tomonlar bundan buyon ham Oʻzbekiston va Saudiya Arabistoni oʻrtasida soha yoʻnalishida ikki tomonlama hamkorlikni mustahkamlash uchun barcha saʼy-harakatni ishga solishga tayyor ekanliklarini bildirdi.