Bektemir tumanidagi sanoat korxonasida ishlab chiqarish va investitsiya loyihalari o‘rganildi
2026-11-07 10:00:00 / Yangiliklar

🔵 O‘zbekiston Respublikasi Bosh vaziri o‘rinbosari, Hukumat komissiyasi raisi J.A. Xodjayevning Toshkent shahri Bektemir tumanidagi ishchi dasturi doirasida Texnik jihatdan tartibga solish agentligi direktori o‘rinbosari Jo‘rabek Shakarov “O‘zmaxsussuvta’mir ta’minot” AJ faoliyati bilan tanishdi.
🔴 Korxona elektr dvigatellari, generatorlar va transformatorlar ishlab chiqarishga ixtisoslashgan bo‘lib, elektrotexnika sanoatini rivojlantirish, import o‘rnini bosuvchi mahsulotlar ishlab chiqarish va eksport salohiyatini oshirishga qaratilgan loyihalarni amalga oshirmoqda.
Xususan, korxonada umumiy qiymati 55 million dollarlik investitsiya loyihasi doirasida ishlab chiqarish quvvatlarini kengaytirish ishlari olib borilmoqda. Loyiha natijasida 650 ta yangi ish o‘rni yaratish, 671 milliard so‘mlik mahsulot ishlab chiqarish, 17 million dollarlik eksportni amalga oshirish hamda 205,5 milliard so‘mlik import o‘rnini bosuvchi mahsulotlar tayyorlash rejalashtirilgan.
O‘rganish jarayonida ishlab chiqarish quvvatlari, mahsulotlar sifati va raqobatbardoshligini oshirish, standartlashtirish, muvofiqlikni baholash hamda mahalliy mahsulotlarning ichki va tashqi bozorlardagi o‘rnini mustahkamlash masalalari muhokama qilindi.
Shuningdek, korxona vakillari tomonidan elektr dvigatellari, generatorlar va transformatorlar importining yuqoriligi, davlat xaridlarida import mahsulotlari bilan narx jihatidan raqobatlashishdagi qiyinchiliklar hamda mahalliy ishlab chiqarilgan tovar sertifikatlarining belgilangan mezonlarga muvofiqligini qayta ko‘rib chiqish zaruratiga oid muammolar ko‘tarildi.
🟢 Mazkur masalalar yuzasidan Agentlik vakolatlari doirasida tegishli o‘rganishlar olib borish, mahsulotlarning amaldagi standartlar va texnik reglamentlar talablariga muvofiqligini ta’minlash, muvofiqlikni baholash jarayonlaridagi muammolarga amaliy yechim topish hamda mahalliy ishlab chiqaruvchilarni qo‘llab-quvvatlash imkoniyatlari ko‘rib chiqildi.
🟤Bundan tashqari, korxonaning “Yangi avlod” sanoat zonasida elektr dvigatellari, generatorlar va transformatorlar ishlab chiqarish klasterini tashkil etish bo‘yicha istiqbolli loyihasi bilan tanishildi.



