O‘zbekiston va Vengriya: texnik jihatdan tartibga solish sohasida hamkorlikning yangi istiqbollari
2026-10-31 11:00:00 / Yangiliklar
🔵O‘zbekiston Respublikasi Texnik jihatdan tartibga solish agentligi vakillari va Vengriya Respublikasining O‘zbekistondagi Favqulodda va Muxtor Elchisi Yozef Ro‘ja (Yózsef Rózsa) o‘rtasida uchrashuv bo‘lib o‘tdi.
Muloqot davomida ikki mamlakat o‘rtasida texnik jihatdan tartibga solish, standartlashtirish, muvofiqlikni baholash hamda mahsulotlar xavfsizligini ta’minlash yo‘nalishlaridagi hamkorlikni rivojlantirish istiqbollari muhokama qilindi.
Qayd etilganidek, 2025-yil yakunlariga ko‘ra, O‘zbekiston va Vengriya o‘rtasidagi tovarlar tashqi savdo aylanmasi qariyb 116 million AQSH dollarini tashkil etgan.
🔴Uchrashuvda texnik reglamentlarni xalqaro talablar va ilg‘or standartlar asosida ishlab chiqish, bozor nazorati mexanizmlarini takomillashtirish, sog‘lom raqobat muhitini shakllantirish hamda milliy ishlab chiqaruvchilarning xalqaro bozorlardagi raqobatbardoshligini oshirish masalalariga alohida e’tibor qaratildi.
🟢Shuningdek, O‘zbekiston Respublikasi Prezidentining 2025-yil 19–21-may kunlari Vengriyaga amalga oshirgan rasmiy tashrifi doirasida texnik jihatdan tartibga solish sohasida erishilgan kelishuvlarning ijrosi ko‘rib chiqildi.
🟡Uchrashuv yakunida tomonlar o‘zaro manfaatli hamkorlikni izchil davom ettirish, erishilgan kelishuvlar ijrosini ta’minlash va istiqbolli yo‘nalishlarda qo‘shma tashabbuslarni amalga oshirishga tayyor ekanliklarini bildirdilar.