O‘zbekistonda quyosh panellarini sinovdan o‘tkazish laboratoriyasi tashkil etiladi
2026-10-19 11:00:00 / Yangiliklar
Janubiy Koreya Respublikasining Seul shahrida O‘zbekiston texnik jihatdan tartibga solish sohasi direktori o‘rinbosari Jo‘rabek Shakarov O‘zbekistonda quyosh panellarini sinovdan o‘tkazish laboratoriyasini tashkil etish loyihasida ishtirok etadigan koreyalik mutaxassislar jamoasi bilan uchrashdi.
2026–2029-yillarda amalga oshirilishi rejalashtirilgan mazkur loyihani Toshkent viloyatining Piskent tumanida amalga oshirish ko‘zda tutilgan. Loyihani moliyalashtirish uchun Koreya hukumati tomonidan 8 million AQSh dollari miqdorida mablag‘ ajratilishi rejalashtirilgan.
Uchrashuv davomida loyihaning maqsad va vazifalari, amalga oshirish bosqichlari, koreyalik mutaxassislarni jalb etish hamda tomonlar o‘rtasidagi hamkorlikning ustuvor yo‘nalishlari muhokama qilindi.
Loyiha doirasida O‘zbekistonda quyosh panellarini sinovdan o‘tkazish imkoniyatlarini kengaytirish, zamonaviy laboratoriya infratuzilmasini yaratish hamda qayta tiklanuvchi energiya manbalari sohasida texnik sinovlarni amalga oshirish salohiyatini rivojlantirish nazarda tutilgan.
Mazkur loyiha mamlakatimizda texnik jihatdan tartibga solish tizimini takomillashtirish, quyosh energetikasi sohasida sinov infratuzilmasini rivojlantirish hamda O‘zbekiston va Janubiy Koreya o‘rtasidagi texnologik hamkorlikni yanada mustahkamlashga xizmat qiladi.