Fransiyada Tarozi va o‘lchovlar Bosh konferensiyasining (CGPM) navbatdagi 28-yig‘ilishi oldidan ochiq muhokama bo‘lib o‘tdi
2026-10-13 10:00:00 / Yangiliklar
🔵2026-yil 12-oktabr kuni Fransiya Respublikasining Sevr shahrida joylashgan Xalqaro tarozi va o‘lchovlar byurosi (BIPM) bosh qarorgohida CGPMning navbatdagi 28-yig‘ilishi oldidan ochiq muhokama tashkil etildi.
Mazkur muhokamada Metr konvensiyasiga a’zo davlatlar hamda Xalqaro tarozi va o‘lchovlar qo‘mitasi (CIPM) vakillari ishtirok etdi.
Tadbir davomida CGPMning navbatdagi 28-yig‘ilishi bilan bog‘liq tashkiliy va protsessual masalalar, CIPM hamda uning Saylov qo‘mitasi (CEC/EC) a’zolarini saylash tartibi, shuningdek, yig‘ilish kun tartibiga kiritilgan rezolyutsiya loyihalari muhokama qilindi.
Shuningdek, BIPMning 2028–2031-yillarga mo‘ljallangan ish dasturi va tashkilot faoliyatini moliyalashtirish masalalari ko‘rib chiqildi.
🔴E’tiborlisi, O‘zbekiston Respublikasi ilk bor CGPMning navbatdagi 28-yig‘ilishida Metr konvensiyasining to‘laqonli a’zosi sifatida ishtirok etadi. Bu mamlakatimizning xalqaro metrologiya hamjamiyatidagi o‘rnini mustahkamlash hamda metrologiya sohasidagi xalqaro qarorlarni qabul qilish jarayonlarida bevosita ishtirok etish imkoniyatlarini kengaytiradi.
🟢CGPMning navbatdagi 28-yig‘ilishi 2026-yil 13–15-oktabr kunlari Fransiya Respublikasining Versal shahrida bo‘lib o‘tishi rejalashtirilgan.
🔴Tarozi va o‘lchovlar Bosh konferensiyasining (CGPM) 28-yig‘ilishi doirasida O‘zbekiston vakillari Xalqaro tarozi va o‘lchovlar byurosi (BIPM) laboratoriyalariga tashrif buyurib, ularning faoliyati, zamonaviy o‘lchash texnologiyalari hamda xalqaro metrologik kuzatiluvchanlikni ta’minlash bo‘yicha olib borilayotgan ishlar bilan yaqindan tanishdilar.
Tashrif davomida O‘zbekiston delegatsiyasi va BIPM vakillari o‘rtasida O‘zbekiston milliy metrologiya instituti birlamchi etalonlarini BIPM laboratoriyalarida kalibrlash masalalari yuzasidan muzokaralar o‘tkazildi.
🫥 O‘zbekistonning BIPMga to‘laqonli a’zo bo‘lishi natijasida ilk bor O‘zbekiston milliy metrologiya instituti birlamchi etalonlarini bevosita BIPM laboratoriyalarida bepul kalibrlash imkoniyati yaratildi.
Muzokaralar davomida mazkur kalibrlash ishlarini 2027-yildan boshlab bosqichma-bosqich amalga oshirish masalalari muhokama qilindi.
🫥 Ushbu hamkorlik milliy etalonlarning xalqaro darajada metrologik kuzatiluvchanligini ta’minlash, o‘lchash natijalarining xalqaro miqyosda tan olinishini mustahkamlash hamda O‘zbekiston milliy metrologiya tizimini yanada rivojlantirishga xizmat qiladi.