UNIDO bilan sifat infratuzilmasini rivojlantirish bo‘yicha hamkorlik istiqbollari muhokama qilindi
2026-09-27 12:00:00 / Yangiliklar
🔵 O‘zbekiston texnik jihatdan tartibga solish agentligida Birlashgan Millatlar Tashkilotining Sanoat taraqqiyoti tashkiloti (UNIDO) vakillari bilan on-line uchrashuv bo‘lib o‘tdi.
Muloqot davomida O‘zbekistonda sifat infratuzilmasini rivojlantirish, texnik jihatdan tartibga solish sohasida amalga oshirilayotgan islohotlar hamda mamlakatning xalqaro reyting va indekslardagi ko‘rsatkichlarini yaxshilash masalalari muhokama qilindi.
Uchrashuvda sifat infratuzilmasining zamonaviy tizimini shakllantirish, xalqaro standartlar va ilg‘or xorijiy tajribani joriy etish, milliy texnik jihatdan tartibga solish tizimining xalqaro talablarga muvofiqligini ta’minlash borasida amalga oshirilayotgan ishlar haqida ma’lumot berildi.
🔴 Shuningdek, texnik jihatdan tartibga solish va sifat infratuzilmasini takomillashtirish yo‘nalishidagi islohotlarni xalqaro hamkorlik doirasida yanada rivojlantirish, UNIDO bilan qo‘shma loyihalarni amalga oshirish hamda sohadagi institutsional salohiyatni oshirish masalalari yuzasidan fikr almashildi.
Uchrashuv davomida Agentlik vakillari 2026-yilda Vena shahrida o‘tkazilishi rejalashtirilgan “Global Quality Forum 2026” xalqaro forumida ishtirok etishga taklif etildi. Mazkur forum sifat infratuzilmasi, barqaror sanoat taraqqiyoti va xalqaro hamkorlik yo‘nalishlarida ilg‘or tajriba almashish uchun muhim xalqaro muloqot maydoni bo‘lishi kutilmoqda.
🟢 Muloqot yakunida tomonlar o‘zaro hamkorlikni izchil davom ettirish, belgilangan ustuvor yo‘nalishlar bo‘yicha amaliy muloqotlarni faollashtirish va qo‘shma loyihalarni ilgari surish yuzasidan kelishib oldilar.