“Andijon Texnopark” MIZda aqlli suv hisoblagichlar ishlab chiqarish loyihasi o‘rganildi
2026-09-23 11:00:00 / Yangiliklar
✅ O‘zbekiston texnik jihatdan tartibga solish agentligi direktorining birinchi o‘rinbosari Lazizbek Saidoripov Andijon viloyatidagi “Andijon Texnopark” maxsus iqtisodiy zonasida amalga oshirilayotgan investitsiya loyihalari bilan tanishdi.
✅ Unda “SANCHUAN TECHNOLOGY” MChJ xorijiy korxonasi tomonidan aqlli suv hisoblagichlar ishlab chiqarishni yo‘lga qo‘yish loyihasi ko‘rib chiqildi.
Loyiha doirasida zamonaviy texnologiyalar asosida suv hisoblagichlarini ishlab chiqarish, mahsulotlarni mahalliylashtirish, shuningdek, ichki va tashqi bozorlarga yetkazib berish imkoniyatlari muhokama qilindi.
Shuningdek, ishlab chiqariladigan mahsulotlarning sifat va xavfsizlik talablariga muvofiqligini ta’minlash, texnik reglamentlar va standartlar talablariga javob berishini baholash, sinov hamda muvofiqlikni baholash jarayonlarini tashkil etish masalalariga e’tibor qaratildi.
✅ Agentlik mutaxassislari tomonidan korxonaga mahsulotlarni milliy va xalqaro standartlar talablariga muvofiq ishlab chiqarish, zarur muvofiqlikni baholash hujjatlarini rasmiylashtirish hamda eksport bozorlariga chiqish bo‘yicha amaliy ko‘mak ko‘rsatish masalalari yuzasidan fikr almashildi.
✅ Mazkur loyiha zamonaviy suv hisoblagichlarini mahalliy ishlab chiqarishni rivojlantirish, import o‘rnini bosuvchi mahsulotlar ishlab chiqarish va kelgusida eksport salohiyatini oshirishga xizmat qiladi.